काठमाडौँ । नयाँसडक बुलेटिनमा यहाँहरूलाई स्वागत छ। आज २० बुधबार । यस्ता छन् दिनभरी घटेका मुख्यमुख्य आर्थिक समाचारहरू....

राजावादी प्रदर्शनमा संलग्न राप्रपा नेताहरूको म्याद थप: रवीन्द्र मिश्र र धवलशमेर जबरासहित ४१ जना पक्राउ

काठमाडौ ।काठमाडौंको तीनकुनेमा भएको राजावादी प्रदर्शनमा संलग्नता राखेका राप्रपा नेता रवीन्द्र मिश्र र धवलशमेर जबरासहित ४१ जना व्यक्तिहरूसँगको म्याद थप गरिएको छ। पक्राउ गरिएका सबैलाई दोस्रो पटक ६ दिनको हिरासतमा राखेर अनुसन्धान गर्ने अनुमति अदालतले दिएको छ। उनीहरूलाई काठमाडौं जिल्ला अदालतमा लगेर म्याद थप प्रक्रिया सम्पन्न गरिएको हो। वर्तमानमा सबै पक्राउ परेका व्यक्तिहरू जिल्ला प्रहरी परिसर काठमाडौंको हिरासतमा छन्।

सरकारको निर्णय : तीनकुने प्रदर्शनमा ज्यान गुमाएकाको परिवारलाई १० लाख रुपैयाँ क्षतिपूर्ति

काठमाडौ । सरकारद्वारा राजावादी प्रदर्शनमा ज्यान गुमाएका सविन महर्जन र पत्रकार सुरेश रजकको परिवारलाई १० लाख रुपैयाँ दिने निर्णय। गृहमन्त्रीस्तरीय बैठकले गर्ने निर्णयको आधारमा मृतकका परिवारलाई मुआवजा प्रदान गरिनेछ।

सहकारी अभियान र सरकार सँगैसँगै हातेमालो गरेर अगाडि बढिरहेको छ : उपप्रधानमन्त्री सिंह

काठमाडौँ । प्रधानमन्त्रीको समेत जिम्मेवारी सम्हाल्नुभएका उपप्रधानमन्त्री तथा सहरी विकासमन्त्री प्रकाशमान सिंहले सहकारी अभियान र सरकार सँगैसँगै हातेमालो गरेर अगाडि बढिरहेको बताउनुभएको छ । 

काठमाडौँमा आज आयोजित ६८औँ राष्ट्रिय सहकारी दिवस तथा अन्तरराष्ट्रिय सहकारी वर्ष–२०२५ को मूल समारोहलाई सम्बोधन गर्दै उपप्रधानमन्त्री सिंहले सहकारी मर्यादित हुन सके मात्रै त्यसले समुन्नत समाज निमार्णको आधार तयार गर्न सक्ने बताउनुभयो । 

“सहकारीका सदस्यहरु साझा बन्धनमा बलियो गरी बाँधिएका हुन्छन् अर्थात् सहकारीमा साझा बन्धन अनिवार्य हुन्छ । नेपालको सहकारी अभियानमा ७३ लाखभन्दा बढी सदस्य आबद्ध छन्”, उहाँले भन्नुभयो, “सहकारीमा महिलाको ५६ प्रतिशत सहभागिता रहेको छ, यसले महिला सशक्तिकरण र नेतृत्व विकासमा आफ्नो योगदानलाई थप सार्थक तुल्याएको छ ।”

नेपाल उद्योग परिसङ्घ र थाई उद्योग महासङ्घबीच लगानी प्रवर्द्धनसम्बन्धी समझदारी

काठमाडौँ । नेपाल उद्योग परिसङ्घ (सिएनआई)र थाई उद्योग महासङ्घ (एफटीआई) बीच लगानी प्रवद्र्धन तथा सहकार्यसम्बन्धी समझदारीपत्रमा हस्ताक्षर भएको छ ।प्रधानमन्त्री केपी शर्मा ओलीको औपचारिक थाइल्याण्ड भ्रमणका क्रममा दुई देशका निजी क्षेत्रबीच लगानी प्रवद्र्धन, आर्थिक तथा व्यावसायिक सम्बन्ध विस्तारका लागि समझदारी भएको सिएनआईले जनाएको छ ।
       
समझदारीपत्रमा परिसङ्घका अध्यक्ष राजेशकुमार अग्रवाल र एफटीआईका अध्यक्ष क्रियेंग्राई थेननुकुलले हस्ताक्षर गर्नुभयो ।  “लगानी तथा व्यापार प्रवद्र्धनसँगै आर्थिक तथा व्यापारसम्बन्धी अध्ययन, अनुसन्धान, तालिम तथा क्षमता विकास, कानुनी, नीतिगत विषयमा जानकारी आदान–प्रदानलगायतमा सहकार्य गर्न दुई संस्थाबीच समझदारी भएको हो”, परिसङ्घद्वारा जारी प्रेस विज्ञप्तिमा भनिएको छ ।

टाइम फार्मास्युटिकल्स लिमिटेडले बुक विल्डिङ विधिबाट आईपीओ निष्कासनको तयारी

काठमाडौं ।टाइम फार्मास्युटिकल्स लिमिटेडले बुक विल्डिङ विधिबाट आईपीओ निष्कासन गर्ने तयारी गरेको छ। कम्पनीको सञ्चालक समितिको बैठकले २५ फागुन २०८१ गते यस सम्बन्धी निर्णय गरेको हो। यसै क्रममा, कम्पनीले विशेष साधारण सभा बोलाउन निर्णय गरेको छ।

विशेष साधारण सभा
कम्पनीले वैशाख ११ गते विशेष साधारण सभा आयोजना गर्ने निर्णय गरेको छ। सभा कम्पनीको उद्योग परिसर, गैडाकोट, नवलपरासीमा अपराह्न १२ः३० बजे हुनेछ।

संशोधित पूँजी प्रस्ताव
सभाले कम्पनीको जारी पूँजीलाई ४२ करोड ९१ लाख ११ हजार ८०० रुपैयाँबाट वृद्धि गरेर ४६ करोड रुपैयाँ कायम गर्ने प्रस्ताव पारित गर्नेछ। यस संशोधित पूँजीको ७९.३४७८ प्रतिशत संस्थापक समूहका लागि र २०.६५२१ प्रतिशत सर्वसाधारण समूहका लागि वितरण हुनेछ।

शेयर बजार : नेप्से परिसूचकमा २५.३१ अंकले बढेर २७०१.४८ बिन्दुमा, ५ अर्ब ४४ करोडभन्दा बढीको कारोबार

काठमाडौँ । आज नेप्से परिसूचकमा २५.३१ अंकले बढेर २७०१.४८ बिन्दुमा आएको छ ।आज ५  अर्ब ४४ करोड रुपैयाँभन्दा बढीको सेयर कारोबार भएको छ । २ वटा कम्पनी सकारात्मक सर्किट लेबलमा कारोबार भएका छन् भने एउटा कम्पनीमा नकारात्मक सर्किट लागेको छ । २ वटाबाहेक बाँकी सबै समूहका सूचक बढेका छन् । 

यस दिन ३ सय १८ कम्पनीको १ करोड ४ लाखभन्दा बढी कित्ता सेयर कारोबार भएको छ । ३६ करोड ५५ लाख रुपैयाँभन्दा बढीसहित कारोबार रकममा सीइडीबी होल्डिङस अग्रस्थानमा रहेको छ । आज  दोस्रो र तेस्रो स्थानमा क्रमशः हिमालयन रिइन्सुरेन्स र ङादी ग्रुप पावर परेका छन् ।

सानिमा रिलायन्स लाइफ इन्स्योरेन्सको नगद लाभांश वितरण

काठमाडौं । सानिमा रिलायन्स लाइफ इन्स्योरेन्स कम्पनीले यस वर्षको नगद लाभांश वितरणको निर्णय गरेको छ। कम्पनीले चैत ८ गते सम्पन्न वार्षिक साधारण सभामा ९ दशमलव २५ प्रतिशत कुल लाभांश वितरण गर्ने प्रस्ताव पारित गरेको हो। यस अनुसार, कम्पनीले आर्थिक वर्ष ०८०/८१ को मुनाफाबाट १ दशमलव २५ प्रतिशत बोनस शेयर र ८ प्रतिशत नगद लाभांश वितरण गर्ने निर्णय गरेको छ।

लाभांश वितरणको प्रक्रिया
बोनस शेयर धितोपत्र दोस्रो बजारमा सूचीकृत भएपछि वितरण गरिने तयारी छ। नगद लाभांश भने शेयरधनीहरूको बैंक खातामा जम्मा गर्न सुरु गरिएको छ। साधारण सभा प्रयोजनका लागि कम्पनीले फागुन २६ गते बुक क्लोज गरेको थियो, र फागुन २५ गतेसम्म कायम शेयरधनीहरूले मात्र कम्पनीको लाभांश प्राप्त गर्न पाउनेछन्।

नगद लाभांश बैंक खातामा जम्मा गरिने भएकाले, शेयरधनीहरूले यदि आफ्नो बैंक खाता नम्बर अद्यावधिक नगरेको छ भने यथाशिघ्र त्यसलाई अपडेट गर्न कम्पनीले अनुरोध गरेको छ।

सभापोखरी हाइड्रोपावर लिमिटेड र नागरिक लगानी कोषबीच सेयर प्रत्याभूति सम्झौता

काठमाडौं । नागरिक लगानी कोष र सभापोखरी हाइड्रोपावर लिमिटेड बीच सेयर प्रत्याभूति गर्ने सम्झौता सम्पन्न भएको छ। बुधबार भएको सम्झौतामा कोषका कार्यकारी निर्देशक शोभा श्रेष्ठ सुवेदी र सभापोखरी हाइड्रोका प्रबन्ध निर्देशक श्रीराम देवकोटाले हस्ताक्षर गरे।

सभापोखरी हाइड्रोपावर लिमिटेडले १०० रुपैयाँ प्रति सेयरको दरमा १० लाख ७५ हजार कित्ता सेयर निष्काशन गर्ने योजना बनाएको छ, जसको कुल मूल्य १० करोड ७५ लाख रुपैयाँ हुने छ। उक्त सेयरको प्रत्याभूति नागरिक लगानी कोषले गर्नेछ। कम्पनीले संखुवासभा जिल्लास्थित सभापोखरी गाउँपालिकामा ५ मेगावाट क्षमताको लङ्खुवा खोला जलविद्युत आयोजना स्थापना गरेको छ।

विद्युत् प्राधिकरणका दुवै रिट ‘हेर्दाहेर्दै’ मा

काठमाडौँ । सर्वोच्च अदालतमा नेपाल विद्युत् प्राधिकरणको कार्यकारी निर्देशकबाट हटाइएका कुलमान घिसिङ र नवनियुक्त हितेन्द्रदेव शाक्यको रिट निवेदन रिट हेर्दाहेर्दैमा बिहीबारका लागि सुनुवाइ हुनेभएको छ ।
 
     न्यायाधीशद्वय कुमार चुडाल र नित्यानन्द पाण्डेयको संयुक्त इजलासले आज दुवैका रिटमाथि सुनुवाइ हुँदाहुँदै समय नभ्याएपछि हेर्दाहेर्दैमा बिहीबारका लागि सुनुवाइ हुने तय भएको हो ।
 
     प्राधिकरणको कार्यकारी निर्देशक पदबाट आफूलाई हटाउने सरकारको निर्णय बदरको माग गर्दै कुलमान घिसिङले रिट निवेदन दायर गर्नुभएको थियो ।
 
     प्राधिकरणका कार्यकारी निर्देशक हितेन्द्रदेव शाक्यले चार वर्षअघि आफूलाई निकालेर घिसिङको नियुक्ति नै गलत भएको उल्लेख गर्दै त्यतिबेला रिट निवेदन दायर गर्नुभएको थियो ।

सञ्चारमाध्यम र सञ्चारकर्मीमाथि हमला गर्नेलाई हदैसम्मको कारवाही हुन्छ  : गृहमन्त्री लेखक

काठमाडौँ । गृहमन्त्री रमेश लेखकले यही चैत १५ गते शुक्रबार काठमाडौँको तिनकुनेमा सञ्चारमाध्यम र सञ्चारकर्मीमाथि भएको हिंसात्मक घटनाको निष्पक्ष छानविन गरी दोषीलाई हदैसम्मको कारवाही गर्ने प्रतिबद्धता व्यक्त गर्नुभएको छ ।  

नेपाल पत्रकार महासङ्घका महासचिव रामप्रसाद दाहाल नेतृत्वको टोलीले आज मन्त्रालयमा दिएको ध्यानाकर्षणपत्र बुझ्दै गृहमन्त्री लेखकले अराजक, हिंस्रक एवम् सिद्धान्त बिनाको भिडले तिनकुनेमा वितण्डा मच्चाएको घटनाप्रति सरकार गम्भीर रहेको बताउनुभयो ।  

“तिनकुनेमा भएको अराजक भिडको कुनै निश्चित वाद, सिद्धान्त केही पनि थिएन, मात्रै अपराधिक कार्य गर्ने उद्देश्य थियो, लक्ष्य थियो ।” गृहमन्त्री लेखकले भन्नुभयोे, “विध्वंश मच्चाउने झुण्डले उग्रता देखायो, त्यसको मार सञ्चारगृह र सञ्चारकर्मीलाई पर्न गएको छ, यस विषयमा नेपाल सरकार गम्भिर छ ।”

ट्रकमा भेटिएको २५ करोडको मालिक पता लाग्यो: राजस्व अनुसन्धान विभाग

काठमाडौँ  । राजस्व अनुसन्धान विभागले काठमाडौंको टोखास्थित झोरमा ट्रकमा भेटिएको २५ करोड बराबरको डलर र युरोको मालिकको पहिचान गरिएको जनाएको  छ । इन्टिलिजेन्स र विज्ञ अनुसन्धानबाट शंका गरिएका व्यक्तिको पहिचान खुलेको जनाइएको हो ।  अनुसन्धान विभाग अुनसार उक्त सिन्धुपाल्चोकको भोटेकोशी गाउँपालिका–४ स्थायी घर भई टोखा नगरपालिका–१० बस्ने नारायण पौडेलको रहेको खुलेको छ ।गत चैत ४ गते राति ना ७ ख १६५२ नम्बरको ट्रकमा लुकाएर लाँदै गरेको अवस्थामा सिन्धुपाल्चोकका ४३ वर्षीय कुसाङ लामालाई पक्राउ गरिएको  थियो । भोटेकोशी गाउँपालिका–१ का लामाले चालक सिट पछाडि फल्स बटम बनाएर रकम राखेको अवस्थामा  पक्राउ गरिएको  थियो ।चालक लामाको बैंक खाताको विवरण हेर्दा अस्वभाविक कारोबार देखिएको  जनाइएको छ । जसको सीडीआर विश्लेषणबाट पौडेलको मोबाइलमा अन्तिम पटक सम्पर्क भएको  अनुसन्धानबाट खुलेको छ ।

चेम्बर र टुरिजम काउन्सिल थाइल्याण्डबीचच पर्यटन क्षेत्रमा सहकार्यको समझदारीपत्रमा हस्ताक्षर

काठमाडौँ ।  नेपाल चेम्बर अफ कमर्स र टुरिजम काउन्सिल अफ थाईल्याण्डबीच व्यापार, पर्यटन र नागरिक उड्डयनको क्षेत्रमा सहकार्यको समझदारी भएको छ । नेपालका प्रधानमन्त्री केपी शर्मा ओली र थाईल्याण्डका  प्रधानमन्त्री पेईतोङत्रान सिनावात्राको उपस्थितीमा बैंककमा भएको समझदारी पत्रमा नेपाल चेम्बर अफ कमर्सका अध्यक्ष कमलेश कुमार अग्रवाल र टुरिजम काउन्सिल अफ थाईल्याण्डका अध्यक्ष चाई अरुनानोनडिचाईले हस्ताक्षर गर्नुभयो ।

म्यान्मामा भूकम्पबाट मृत्यु हुनेको सङ्ख्या दुई हजार ८८६ पुग्यो

याङ्गुन ।म्यान्मामा शुक्रबार ७.९ म्याग्निच्युडको भूकम्पपछि मृत्युको सङ्ख्या दुई हजार ८८६ पुगेको र चार हजार ६३९ जना घाइते भएका छन् । 
म्यान्मा रेड क्रस सोसाइटीका अध्यक्ष म्यो न्युन्टले भन्नुभयो,“प्राकृतिक प्रकोपको मूल्याङ्कन र आपतकालीन आपूर्ति वितरणमा रसद समन्वयको अभाव प्रमुख समस्या बनेको छ ।”

उद्धार टोलीहरूले प्रभावित क्षेत्रमा सुरक्षा चिन्ताहरूका कारण आपूर्ति वितरणमा ठूलो समस्या भोगिरहेका छन् । यसका साथै, भारी यन्त्रको अभावले उद्धार कार्यलाई थप कठिन बनाएको म्यो न्युन्टले बताउनुभयो ।

यस भूकम्पले म्यान्माको पश्चिमी र दक्षिणी क्षेत्रलाई ठूलो प्रभाव परेको छ, जहाँ दर्जनौँ घर र इमारतहरू पूर्ण रूपमा ध्वस्त भएका छन् । भूकम्पको गहिराई र दुरगामी प्रभावका कारण उद्धार कार्यमा समय लागिरहेको छ । सरकारले आपतकालीन राहतका लागि अन्तर्राष्ट्रिय समुदायसँग सहयोगको अपील गरेको छ ।

अमेरिकाले फिलिपिन्सलाई पाँच अर्ब ५८ करोड डलरको लडाकू विमान बिक्री गर्ने

वासिङ्टन ।अमेरिकाले फिलिपिन्सलाई पाँच अर्ब ५८ करोड अमेरिकी डलर बराबरको एफ–१६ लडाकू विमान बिक्री गर्न स्वीकृति दिएको जनाएको छ ।

अमेरिकी विदेश मन्त्रालयले २० वटा एफ–१६ जेट विमान र त्यससँग सम्बन्धित उपकरणहरु संयुक्त राज्य अमेरिकाको सन्धिमा बाँधिएको सहयोगी फिलिपिन्सलाई बिक्री गर्न लागेको जनाएको छ ।

अमेरिकी विदेश मन्त्रालयले जारी गरेको विज्ञप्तिमा भनिएको छ, “यो बिक्रीले दक्षिणपूर्वी एसियामा राजनीतिक स्थिरता, शान्ति र आर्थिक प्रगतिका लागि महत्वपूर्ण शक्तिका रुपमा रहेको रणनीतिक साझेदारको सुरक्षामा सुधार ल्याउनेछ ।”

“यसले फिलिपिन्सको वायु सेनाको समुद्री डोमेन जागरूकता सञ्चालन गर्ने क्षमतालाई पनि बढावा दिनेछ र ‘दुश्मनको हवाई आक्रमण र दमनको थप प्रतिरक्षा गर्नेछ,” विज्ञप्तिमा भनिएको छ।

बीमा प्राधिकरणका अध्यक्ष ओझाको नियुक्तिबारे सर्वोच्च अदालतद्वारा कारण देखाउ आदेश

काठमाडौँ । सर्वोच्च अदालतले नेपाल बीमा प्राधिकरणका अध्यक्ष शरद ओझाको नियुक्तिविरुद्ध परेको रिटमा कारण देखाउ आदेश दिएको छ।न्यायाधीश नहकुल सुवेदीको एकल इजलासले ओझाको नियुक्तिविरुद्ध परेको रिटमा सुनुवाईपछि बुधबार कारण देखाउ आदेश जारी गरेको हो ।साथै इजलासले वादी र प्रतिवादी दुवै पक्षलाई छलफलका लागि बोलाएको छ।

अधिवक्ता इन्दिरा धमलाले  ओझाको नियुक्तिविरुद्ध चैत १७ गते प्रधानमन्त्री तथा मन्त्रिपरिषद् कार्यालय, अर्थ मन्त्रालय, सिफारिस समिति, प्राधिकरण र ओझालाई प्रतिवादी बनाएर सर्वोच्चमा रिट दायर गरेकी थिइन्।

महिला निर्देशकको द्वन्द्व प्रधान चलचित्र ‘पीताम्बर’

काठमाडौँ । अभिनेता प्रदीप खड्काले चलचित्र ‘पीताम्बर’ का लागि द्वन्द्वको प्रशिक्षण लिएर आफ्नो पात्रलाई तयार गरेको बताउनुभएको छ । चलचित्र ‘पीताम्बर’ को श्रव्यदृश्य (ट्रेलर) सार्वजनिक गर्न आयोजित पत्रकार सम्मेलनमा चलचित्रको विषयमा जानकारी दिँदै अभिनेता खड्काले आफूले पात्रका लागि शारीरिक तौल घटबढसँगै आवश्यक तयारी गरेको बताउनुभयो ।

उहाँले भन्नुभयो, “निर्देशक, निर्मातासहितको निर्माण समूहले मलाई सुहाउँदो भूमिका छ र यसको तयारी गर्नुपर्छ भनेपछि मैले आफ्नोतर्फबाट सक्दो प्रयास गरेको छु । यसअगाडि एक सामाजिक विषयसँग सम्बन्धित चलचित्रका लागि तौल घटाएको थिएँ, यसका लागि बढाएर आफूलाई पात्रअनुसार तयार गरेँ । एक महिला निर्देशकले द्वन्द्व प्रधान चलचित्र बनाउँछु भनेपछि मैले आफ्नोतर्फबाट सक्दो मेहनत गरेको छु ।”

बजार अनुगमन तीव्रः सात फर्म कारबाहीमा

काठमाडौँ । वाणिज्य, आपूर्ति तथा उपभोक्ता संरक्षण विभागले बजार अनुगमनलाई तीव्रता दिएको छ । अनुगमनका क्रममा विभागले सात वटा फर्मलाई कागजातसहित विभागमा उपस्थित हुन निर्देशन दिएको छ । 

विभागद्वारा गरिएको अनुगमनका क्रममा उपभोक्ता संरक्षण ऐन, २०७५ तथा उपभोक्ता संरक्षण नियमावली, २०७६ को उल्लङ्घन गरेको पाइएपछि विभागले सम्बन्धित व्यवसायीलाई आवश्यक निर्देशन तथा कारबाही गर्नुका साथै एउटा फर्मको बिक्री रोक्कासहित सात वटा फर्मलाई कागजातसहित विभागमा उपस्थित हुन निर्देशन दिएको हो ।

अनुगमनका क्रममा  स्पार्क अटो केयर प्रालि ९काठमाडौँ महानगरपालिका–८० को बिक्री वितरण रोक्का गर्दै सम्बन्धित कागजातसहित विभागमा उपस्थित हुन निर्देशन दिइएको छ ।

भाटभटेनीका सञ्चालकद्वारा राजावादीसँग भिड्नेसुरक्षा गार्डलाई पाँच तह बढुवासहित पाँच लाख पुरस्कार, ज्यान गुमाउनेलाई आर्थिक सहयोग

काठमाडौँ । भाटभटेनी सुपर स्टोरका सञ्चालक मीनबहादुर गुरुङले राजावादी आन्दोलनमा ज्यान गुमाएकाहरूलाई सहयोग गर्ने घोषणा गरेका हुन् ।१५ चैतमा राजावादीको आन्दोलनमा भएको हिंसात्मक घटनामा ज्यान गुमाए दुई मध्ये एक एभिन्युज टेलिभिजनका फोटो पत्रकार सुरेश रजकको परिवारलाई ५ लाख र सवारी मजदुर सविन महर्जनको परिवारलाई ३ लाख रुपैयाँ आर्थिक राहत दिने सञ्चालक गुरुङले घोषणा गरका हुन् ।

विन नेपाल लघुवित्त वित्तीय संस्था लिमिटेडले एफपीओ जारी गर्ने

काठमाडौं । विन नेपाल लघुवित्त वित्तीय संस्था लिमिटेडले चैत २१ गतेदेखि थप सार्वजनिक निष्कासन ९एफपीओ० जारी गर्ने घोषणा गरेको छ। नेपाल धितोपत्र बोर्डबाट माघ ३० गते एफपीओ जारी गर्न अनुमति प्राप्त गरेको कम्पनीले अब सर्वसाधारणलाई ३० प्रतिशत शेयरको हिस्सा प्रस्ताव गर्दै एफपीओ निष्कासन गर्ने निर्णय गरेको हो।

एफपीओ निष्कासनको विवरण
कम्पनीले प्रतिकित्ता १०० रुपैयाँ अंकित मूल्यमा ५१ लाख २९ हजार २५० रुपैयाँबराबरको ५१ हजार २९२ दशमलव ५ कित्ता एफपीओ जारी गर्नेछ। एफपीओ जारी गर्ने मिति छिटोमा चैत २६ गतेसम्म निर्धारित गरिएको छ। तर, यदि आवेदन माग बमोजिम नगरी छिटो अवधि समाप्त भएमा, निष्कासन मिति २०८२ साल वैशाख ४ गतेसम्म लम्बिन सक्छ। यस आधारमा, एफपीओलाई चैत २६ सम्मको अवधिमा निष्कासन हुने अपेक्षा गरिएको छ।

नेपाल राष्ट्र बैंकले ३० अर्ब रुपैयाँको निक्षेप संकलन उपकरण जारी गर्दै

काठमाडौं। नेपाल राष्ट्र बैंकले बजारमा अधिक तरलता व्यवस्थापन गर्नको लागि ३० अर्ब रुपैयाँको निक्षेप संकलन उपकरण जारी गर्ने निर्णय गरेको छ। केन्द्रीय बैंकका अनुसार, यो निक्षेप संकलन उपकरणको बोलकबोल आज, चैत २० गते हुनेछ। इच्छुक बैंक र वित्तीय संस्थाले आज दिउँसो ३ बजेसम्म आवेदन दिन सक्नेछन्।

बैंकिङ प्रणालीमा अत्यधिक तरलता बनेको स्थिति ध्यानमा राख्दै, केन्द्रीय बैंकले यस अघि पनि तरलता व्यवस्थापनका लागि पटकपटक यस्तो उपकरण प्रयोग गर्दै आएको छ। यसअघि गत आइतबार पनि २५ अर्ब रुपैयाँको तरलता तानिएको थियो।

सुनको भाउ ६०० रुपैयाँ घटेर १ लाख ७९ हजार १०० रुपैयाँ

काठमाडौँ ।नेपाल सुन–चाँदी व्यवसायी महासंघका अनुसार बुधबार छापावाल सुन प्रतितोला ६०० सय रुपैयाँले घटेर १ लाख ७९ हजार १०० रुपैयाँ कायम भएको छ ।
यता, आज चाँदीको भाउ पनि तोलामा १५ रुपैयाँले घटेर २ हजार ३५ रुपैयाँ कायम भएको छ ।

यस्तो छ बुधबारका लागि निर्धारित विदेशी मुद्राको विनिमयदर

काठमाडौँ ।नेपाल राष्ट्र बैंकले आजका लागि विदेशी मुद्राको विनिमयदर निर्धारण गरेको छ । राष्ट्र बैंकका अनुसार अमेरिकी डलर एकको खरिदर १३६ रुपैयाँ ४६ पैसा र बिक्रीदर १३७ रुपैयाँ ०६ पैसा कायम भएको छ । 

युरोपियन युरो एकको खरिदर १४७ रुपैयाँ २१ पैसा र बिक्रीदर १४७ रुपैयाँ ८५  पैसा, युके पाउन्ड स्ट्रलिङ एकको खरिदर १७६ रुपैयाँ १० पैसा र बिक्रीदर १७६ रुपैयाँ ८८ पैसा, स्वीस फ्र्याङ्क एकको खरिददर १५४ रुपैयाँ ५९ पैसा र बिक्रीदर १५५ रुपैयाँ २७ पैसा कायम गरिएको छ । 

अष्ट्रेलियन डलर एकको खरिददर ८५ रुपैयाँ २४ पैसा र बिक्रीदर ८५  रुपैयाँ ६१ पैसा, क्यानेडियन डलर एकको खरिदर ९४ रुपैयाँ ७७ पैसा र बिक्रीदर ९५ रुपैयाँ १८ पैसा, सिङ्गापुर डलर एकको खरिददर १०१ रुपैयाँ ५७  पैसा र बिक्रीदर १०२ रुपैयाँ ०१ पैसा निर्धारण गरिएको छ ।

प्रधानमन्त्री ओली र थाइल्याण्डका प्रधानमन्त्री सिनावातबीच भेटवार्ता हुँदै

बैङ्कक ।थाइल्याण्डको औपचारिक भ्रमणमा रहनुभएका प्रधानमन्त्री केपी शर्मा ओली र उहाँका थाइ समकक्षी पे थोङ् थान् शिनावातबीच आज भेटवार्ता हुँदैछ ।

थाइल्याण्डको सरकारी भवनमा भेटवार्ताअघि प्रधानमन्त्री ओली समकक्षी सिनावातले आयोजना गर्नुभएको स्वागत समारोहमा सहभागी हुनुभयो ।

थाइल्याण्डका प्रधानमन्त्री निवातको मैत्रीपूर्ण निमन्त्रणामा नेपालका प्रधानमन्त्रीबाट पहिलोपटक थाइल्याण्डको औपचारिक भ्रमण भएको हो । यो भ्रमणबाट दुई देशबीचको आपसी सम्बन्ध विस्तार र सहकार्यमा योगदान पुग्ने अपेक्षा गरिएको छ । परराष्ट्र मन्त्रालयका अनुसार भेटवार्तापछि संस्कृति र पर्यटनका क्षेत्रमा सहकार्यसम्बन्धी सम्झौतापत्रमा हस्ताक्षर हुने छ । यसैगरी दुई देशबीचका गैरसरकारी र व्यावसायिक संस्थाबीच विभिन्न छ सहमतिपत्र आदाप्रदान हुनेछ ।