काठमाडौँ । नयाँसडक बुलेटिनमा यहाँहरूलाई स्वागत छ। आज चैत १२ मंगलबार । यस्ता छन् दिनभरी घटेका मुख्यमुख्य आर्थिक समाचारहरू...

'सांग्रिला डेभलपमेन्ट बैंक, चिलिमे हाइड्रोपावर, सुपर माई हाइड्रोपावर र कुथेली बुखरी स्मल हाइड्रोपावरको बोनस सेयर सूचीकत

काठमाडौं । नेपाल स्टक एक्सचेन्ज (नेप्से) मा ४ कम्पनीको बोनस सेयर सूचीकृत भएको छ । सोमबार सांग्रिला डेभलपमेन्ट बैंक, चिलिमे हाइड्रोपावर, सुपर माई हाइड्रोपावर र कुथेली बुखरी स्मल हाइड्रोपावरको बोनस सेयर सूचीकत भएको छ । सांग्रिलाको १२ लाख ५२ हजार ८४४.१७ कित्ता बोनस सेयर सूचीकृत भएको छ ।
चिलिमे हाइड्रोपावरको ७९ लाख ८३ हजार ९९७.२० कित्ता र सुपर माई हाइड्रोपावरको ३ लाख ५० हजार कित्ता बोनस सेयर सूचीकृत भएको छ । कुथेली बुखरीको पनि १ लाख २१ हजार ८६७.५० कित्ता बोनस सेयर सूचीकृत भएको छ । 

सांग्रिला डेभलपमेन्ट बैंकले गत वर्षको नाफाबाट ३.६५१६ प्रतिशत बोनस सेयर वितरण गरेको थियो ।  चिलिमेले गत वर्षको नाफाबाट १० प्रतिशत, सुपर माईले ७ प्रतिशत र कुथेली बुखरीले १० प्रतिशत बोनस सेयर वितरण गरेका थिए ।

सम्पदा लघुवित्तको आठौं वार्षिक साधारण सभा  : मर्जर र एक्विजिशनको प्रस्ताव सहित

काठमाडौं । सम्पदा लघुवित्तले आठौं वार्षिक साधारण सभा वैशाख ६ गते बोलाएको छ । सभा मर्स्याङ्दी रिभर भ्यू, बन्दिपुर तनहुँमा बिहान ११ बजेबाट सुरु हुनेछ । यस वर्षको सभा मा कम्पनीले कुनै लाभांशको प्रस्ताव नगरेको छ, जसका कारण सेयरधनीहरूको हात खाली रहनेछ।

सभामा अन्य बैंक तथा वित्तीय संस्थासँग मर्जर वा एक्विजिशनसम्बन्धी कार्य गर्न तथा प्रबन्धपत्र र नियमावली संशोधन गर्न सञ्चालक समितिलाई अख्तियारी दिने प्रस्ताव रहेको छ।

शेयर बजार : नेप्से परिसूचकमा ५५.९० अंकले घटेर २५८४.८८ बिन्दुमा, ५ अर्ब १८ करोडभन्दा बढीको कारोबार

काठमाडौँ । आज नेप्से परिसूचकमा ५५.९० अंकले घटेर २५८४.८८ बिन्दुमा आएको छ । आज ५ अर्ब १८ करोड रुपैयाँभन्दा बढीको सेयर कारोबार भएको छ । नारायणी डेभलपमेन्ट बैंकमा नकारात्मक सर्किट लागेको छ ।

यस दिन ३ सय २५ कम्पनीको १ करोड ११ लाखभन्दा बढी कित्ता सेयर कारोबार भएको छ । २३ करोड २० लाख रुपैयाँभन्दा बढीसहित कारोबार रकममा हिमालयन रिइन्सुरेन्स अग्रस्थानमा रहेको छ । आज  दोस्रो र तेस्रो स्थानमा क्रमशः नेपाल पुनर्बिमा कम्पनी र युनाइटेड मोदी हाइड्रोपावर परेका छन् । 

माछापुच्छ्रे क्यापिटल लिमिटेडलाई नेपाल धितोपत्र बोर्डबाट नयाँ इजाजत: धितोपत्र निष्काशन र शेयर रजिष्ट्रेशन सेवा अब उपलब्ध

काठमाडौं । माछापुच्छ्रे क्यापिटल लिमिटेडले  नेपाल धितोपत्र बोर्डबाट निष्काशन तथा बिक्री प्रबन्धक र शेयर रजिष्ट्रेशनका लागि अनुमति प्राप्त गरेको छ। यस अनुमतिको साथ, कम्पनीले प्राथमिक सार्वजनिक निष्काशन , हकप्रद शेयर, ऋणपत्र  र अन्य धितोपत्रहरूको निष्काशन, बिक्री तथा वितरण प्रक्रियालाई व्यवस्थित गर्न सक्षम हुनेछ।

त्यसका साथै, माछापुच्छ्रे क्यापिटल लिमिटेडले शेयर रजिष्ट्रारको रूपमा शेयरधनीहरूको विवरण व्यवस्थापन, लाभांश वितरण, स्वामित्व हस्तान्तरणजस्ता थप सेवा प्रदान गर्ने क्षमता पनि प्राप्त गरेको छ।

माछापुच्छ्रे क्यापिटल लिमिटेड, माछापुच्छ्रे बैंक लिमिटेडको सहायक कम्पनी हो र यसले नेपाल धितोपत्र बोर्डमार्फत धितोपत्र प्रत्याभूति, लगानी व्यवस्थापन, संस्थागत परामर्श सेवा, निक्षेप सदस्य र सामूहिक लगानी कोषको इजाजत प्राप्त गरी सेवा प्रदान गर्दै आएको छ। हालै, कम्पनीले सामूहिक लगानी कोष अन्तर्गत आफ्नो पहिलो बन्दमुखी योजना “एमबीएल इक्विटी फण्ड” सार्वजनिक निष्काशन गरि सम्पूर्ण इकाइहरू सफलतापूर्वक बिक्री गर्न सफल भएको थियो।

मातृभूमि लघुवित्तको साधारण सभा वैशाख २ गते , एफपीओ जारी गर्ने

काठमाडौं । मातृभूमि लघुवित्तले आफ्नो वार्षिक साधारण सभा आगामी वैशाख २ गते बोलाएको छ। सभा काठमाडौंको अमुप्रस्थ ब्यांक्वेट, एन्ड इभेन्ट्स, बुढानिलकण्ठमा बिहान ११ बजे सुरु हुनेछ। यसपटक कम्पनीले लाभांशसम्बन्धी कुनै प्रस्ताव पेश नगरेकोले सेयरधनीहरूको हात खाली रहनेछ।

सभामा सार्वजनिक निष्कासन (एफपीओ) निष्कासन गर्ने विशेष प्रस्ताव प्रस्तुत गरिनेछ। साथै, अन्य बैंक र वित्तीय संस्थासँग मर्जर अथवा एक्विजिशनसम्बन्धी कार्य गर्नका लागि सञ्चालक समितिलाई अख्तियारी दिने प्रस्ताव पनि हुनेछ। प्रबन्धपत्र र नियमावलीमा आवश्यक संशोधन गर्नका लागि प्रस्ताव पेश हुनेछ।

सुनको भाउ २०० रुपैयाँले घटेर १ लाख ७३ हजार ५०० रुपैयाँ, चाँदीको भाउ स्थिर

काठमाडौं ।नेपाल सुन–चाँदी व्यवसायी महासंघका अनुसार मंगलबार छापावाल सुन प्रतितोल २०० रुपैयाँले घटेर १ लाख ७३ हजार ५०० रुपैयाँ कायम भएको छ । चाँदीको भाउ भने लगातार दोस्रो दिन स्थिर रहेको छ । मंगलबार चाँदीको भाउ तोलामा १९ सय ८० रुपैयाँ कायम रहेको छ ।

विद्युत प्राधिकरणका नवनियुक्त कार्यकारी निर्देशक शाक्यले गरे पदभार ग्रहण

काठमाडौँ।नेपाल विद्युत प्राधिकरणका नवनियुक्त कार्यकारी निर्देशक हितेन्द्र देव शाक्यले पदभार ग्रहण गरेका छन् ।मंगलबार साँझ रत्नपार्कस्थित प्राधिकरणको मुख्यालयमा पुगेर उनले पदभार सम्हालेका हुन् ।

सोमबार बसेको मन्त्रिपरिषदको बैठकले कुलमान घिसिङलाई हटाएर शाक्यलाई निर्देशक नियुक्त गर्ने निर्णय गरेको थियो ।

'आइएमई ग्रुप र आईएक्सआई कर्पको संयुक्त लगानीमा काठमाडौँ टेक्निकल स्कुल सञ्चालनमा, श्रम मन्त्री भण्डारीद्वारा उदघाटन, वार्षिक १० हजार दक्ष जनशक्ति उत्पादनको लक्ष्य'

काठमाडौं । आइएमई ग्रुप र आईएक्सआई कर्पले रोजगार बजारमा दक्ष जनशक्तिको माग पुरा गर्न काठमाडाँै टेक्निकल स्कुल सञ्चालनमा ल्याएका छन् । मंगलबार काठमाडौँको धुम्बाराहीस्थित काठमाडौँ टेक्निकल स्कुलको प्राङगणमा आयोजित एक विशेष समारोहमा श्रम, रोजगार तथा सामाजिक सुरक्षा मन्त्री सरत सिंह भण्डारीले उक्त स्कुलको शुभारम्भ गर्नुभएको हो । यस स्कुलले हस्पिटालिटी, कुलनिरी आर्टस, केयर गिभिङ, बारिस्ता, बार टेन्डिङलगायत तीन दर्जनभन्दा बढी रोजगारमूलक तथा स्वरोजगारमूलक विधाहरुमा तालिमहरु सञ्चालन गर्नेछ । स्कुलले आगामी एक दशकमा १ लाखभन्दा बढी कुशल जनशक्ति तथा प्रोफेशनलहरु उत्पादन गर्ने लक्ष्य लिएको छ । आफ्नो अढाइ दशकको व्यावसायिक यात्रामा आइएमई ग्रूपले बैंक तथा वित्तीय क्षेत्र, बीमा, पर्यटन तथा आतिथ्य, पर्यटन पूर्वाधार, जलविद्युत, म्यानुफ्याक्चरिङलगायत क्षेत्रमा अनेकौं उद्योग तथा परियोजनाहरु सञ्चालन गरिसकेको छ । आइएमई ग्रुपअन्तर्गतका कम्पनीहरुमा २५ हजारभन्दा बढी व्यक्तिले प्रत्यक्ष रोजगारी पाएका छन् । त्यत्ति नै वा त्यसभन्दा बढीलाई स्वरोजगार बनाउन पनि यस ग्रुपले सहयोग गरेको छ। आईएक्सआई कर्पले वैकल्पिक लगानी, वैकल्पिक ऊर्जा, वैकल्पिक शिक्षा, प्रविधि र सार्वजनिक नीतिका क्षेत्रमा काम गरिरहेको छ ।

यस्ता छन् मन्त्रिपरिषद् बैठकका निर्णयहरु (सूचिसहित )

काठमाडौँ । सोमवार सिंहदरबारमा बसेको मन्त्रीपरिषद्को बैठकले प्राधिकरणको कार्यकारी निर्देशकबाट कुलमान घिसिङलाई हटाएर शाक्यलाई नियुक्ति गरेको हो । बैठकका निर्णय सार्वजनिक गर्दै सरकारका प्रवक्ता एवं सञ्चार तथा सूचना प्रविधिमन्त्री पृथ्वीसुब्बा गुरुङले सरकारले सरकारले विश्व बैंकको वित्तीय सहयोगमा सञ्चालन हुन लागेको विद्युत वितरण प्रणाली स्तरोन्नति तथा सुदृढीकरण आयोजनाको लागि प्राप्त हुने ऋण सहायताको वित्तीय सम्झौता र आयोजना दस्तावेजलाई अन्तिम रूप दिन अर्थ मन्त्रालयका सहसचिवको नेतृत्वमा वार्ता टोली गठन गर्ने र वार्ता गर्ने अख्तियारी प्रदान गर्ने निर्णय गरेको बताए ।

विचाराधीन विधेयकलाई शीघ्र टुङ्गोमा पुर्‍याउने सत्तापक्षीय दलको निर्णय

काठमाडौँ । सत्तापक्षीय दलहरुले संसद्मा विचारधीन विधेयकलाई यथाशीघ्र टुङ्गोमा पुर्‍याउने निर्णय गरेका छन् । प्रधानमन्त्री निवास बालुवाटरमा आज बसेको सत्ता पक्ष दलका शीर्ष नेताको बैठकमा संसद्मा विचारधीन विधेयकलाई चाँडै अघि बढाउने विषयमा छलफल भएको बैठकमा सहभागी श्रम, रोजगार तथा सामाजिकमन्त्री शरतसिंह भण्डारीले राससलाई जानकारी दिनुभयो । 

बैठकमा भूमिसम्बन्धी अध्यादेशमा राजनीतिक सहमति जुटाउनेलगायत समसामायिक विषयमा छलफल भएको उहाँले बताउनुभयो ।

बैठकमा प्रधानमन्त्री एवं नेकपा (एमाले)का अध्यक्ष केपी शर्मा ओली, नेपाली कांग्रेसका सभापति एवं पूर्व प्रधानमन्त्री शेरबहादुर देउवा, लोकतान्त्रिक समाजवादी पार्टी नेपालका अध्यक्ष महन्थ ठाकुर, जनमत पार्टीका अध्यक्ष सिके राउत, जनता समाजवादी पार्टीका अध्यक्ष अशोक राई, नागरिक उन्मुक्ति पार्टीका अध्यक्ष रञ्जिता श्रेष्ठलगायत उपस्थित हुनुहुन्थ्यो ।

आर्थिक वृद्धि र खाद्य सुरक्षाका लागि पाकिस्तानले कृषि क्षेत्रलाई बलियो बनाउनेः प्रधानमन्त्री

इस्लामावाद । पाकिस्तानी प्रधानमन्त्री सेहबाज शरीफले आफ्नो देशले आर्थिक वृद्धि बढाउन, खाद्य सुरक्षा सुनिश्चित गर्न र बहुमूल्य विदेशी मुद्रा आर्जन गर्न कृषि क्षेत्रको प्रगतिमा बढी ध्यान दिने बताउनुभएको छ ।

“पाकिस्तानले देशको अर्थतन्त्रमा कृषिको हिस्सा बढाउनु पर्छ, किनकि हाम्रो जनसङ्ख्याको लगभग ६५ प्रतिशत प्रत्यक्ष वा अप्रत्यक्ष रूपमा कृषिसँग सम्बन्धित छ,” प्रधानमन्त्रीले एक कार्यक्रममा भन्नुभयो ।

उहाँले गुणस्तरीय बीउ, मल र औषधि समयमै उपलब्ध भएमा कृषि क्षेत्रमा क्रान्ति आउने र निर्यातमा वृद्धि हुने बताउनुभयो । सरकारले कम्बाइन हार्भेस्टरलगायत कृषि मेसिनरी स्थानीय उत्पादनका लागि पहल गरिरहेको उल्लेख गर्नुभयो ।

नेपाल राष्ट्र बैंकले ४ अर्ब ५३ करोड रुपैयाँ मुद्दति निक्षेपमा लगानी गर्ने

काठमाडौँ ।नेपाल राष्ट्र बैंकले ४ अर्ब ५३ करोड १७ लाख रुपैयाँ बैंक तथा वित्तीय संस्थाहरूमा निक्षेपको रूपमा लगानी गर्ने निर्णय गरेको छ। उक्त रकमलाई विभिन्न कोषहरूबाट मुद्दती निक्षेपको रूपमा राख्नका लागि बैंकहरूबाट प्रस्ताव माग गरिएको छ। यस रकममध्ये ३ अर्ब ६२ करोड ५५ लाख रुपैयाँ वाणिज्य बैंकहरू, ६७ करोड ९७ लाख रुपैयाँ राष्ट्रियस्तरका विकास बैंकहरू, र २२ करोड ६५ लाख रुपैयाँ वित्त कम्पनीहरूमा निक्षेपका रूपमा राखिने बताइएको छ।

स्वास्थ्य बिमा बोर्डको अध्यक्षमा चन्द्रबहादुर थापा नियुक्त

काठमाडौँ ।स्वास्थ्य बिमा बोर्डको अध्यक्षमा प्युठाननिवासी चन्द्रबहादुर थापा क्षेत्री नियुक्त भएका छन्। स्वास्थ्य तथा जनसंख्या मन्त्री पौडेलले मंगलबार मन्त्रालयमा अध्यक्ष नियुक्त थापालाई पद तथा गोपनीयताको शपथ ग्रहण गराए।थापाको नियुक्तिपछि स्वास्थ्य बिमा बोर्डले गति लिने विश्वास गरेको मन्त्री पौडेलले बताए।

पूर्वी नाकाबाट प्लाइउड निर्यात ठप्प

झापा ।  भारतले नेपालमा उत्पादित प्लाइउडलाई नाकामा रोकेको छ । प्लाइउड बोकेका ३४ वटा ट्रकलाई भारतस्थित पानीट्याङ्की स्थल भन्सार कार्यालय रानीगञ्जले रोकेको मेची उद्योग वाणिज्य सङ्घका अध्यक्ष खेम प्रसाईंले बताउनुभयो ।

ती ट्रकहरु दुई साताअघि काँकडभिट्टा नाकाबाट भारत गएका थिए । भारतीय भन्सार कार्यालयले ब्युरो अफ इन्डियन सर्टिफिकेट (बीआइएस) नभएको भनी नेपाली सामानलाई रोकेको प्रसाईंले जानकारी दिनुभयो ।

बिआइएस भारत सरकारको गुणस्तर प्रमाणपत्र हो । भारतले आयात हुने सामान बिआइएस प्रमाणित हुनुपर्ने नयाँ नियम लगाएपछि नेपालबाट प्लाइउड, सिमेन्टलगायत उत्पादनहरुको निर्यात अवरुद्ध भएको छ । काँकडभिट्टा मात्र नभई नेपालका अरु नाकाबाट भारत निर्यात हुने प्लाइउडमा पनि भारतले अवरोध पु(याइरहेको छ ।

भद्रपुर आन्तरिक राजस्व कार्यालयले आठ महिनामा रु १ अर्ब ९८ करोड ९४ लाख ६८ हजार राजस्व सङ्कलन

भद्रपुर । आन्तरिक राजस्व कार्यालय भद्रपुरले चालु आर्थिक वर्षको आठ महिनामा रु एक अर्ब ९८ करोड ९४ लाख ६८ हजार राजस्व सङ्कलन गरेको छ । उक्त रकम गत आव २०८०र०८१ को सोही अवधिको तुलनामा आठ प्रतिशतले बढी हो । 

कार्यालयको तथ्याङ्कअनुसार गत आव २०८०र०८१ को सोही अवधिमा रु एक अर्ब ८४ करोड १७ लाख १५ हजार राजस्व सङ्कलन भएको प्रमुख कर अधिकृत कृष्णचन्द्र काफ्लेले जानकारी दिनुभयो । आन्तरिक राजस्व कार्यालयले चालु आवमा रु चार अर्ब ६१ लाख राजस्व सङ्कलन गर्ने लक्ष्य लिएको छ । 

गत आवभन्दा राजस्व सङ्कलन बढे पनि चालु आवको आठ महिनाको लक्ष्यको ८४ प्रतिशत राजस्व सङ्कलन भएको छ । कार्यालयले आठ महिनामा आयकरबाट रु ८९ करोड २७ लाख ८५ हजार, ब्याजबापत रु छ करोड ९० लाख ९० हजार, मूल्य अभिवृद्धि करबापत रु ६६ करोड ६५ लाख १५ हजार, अन्तःशुल्कबापत रु ३३ करोड १८ लाख ४५ हजार राजस्व सङ्कलन गरेको छ ।

सन् २०२५ मा एसियाको जिडिपी ४.५ प्रतिशतले बढ्ने अनुमान

हाइनान ।बोआओ फोरमले मङ्लबार जारी गरेको गरेको प्रतिवेदनमा सन् २०२५ मा एसियाको वास्तविक कुल गार्हस्थ्य उत्पादन (जिडिपी वृद्धि दर चार दशमलव पाँच प्रतिशत पुग्ने अनुमान गरिएको छ ।   

प्रतिवेदनअनुसार सन् २०२४ मा यस क्षेत्रको जिडिपी चा दशमलव चार प्रतिशतले वृद्धि भएको थियो । 

बढ्दो विश्वव्यापी आर्थिक अनिश्चितताका बावजुद, एसिया विश्व अर्थतन्त्रका लागि प्रमुख वृद्धिको इन्जिनका रूपमा रहेको प्रतिवेदनले उल्लेख गरेको छ ।

हेटौँडा सिमेन्ट उद्योगको पुनःउत्पादन चैतको तेस्रो सातादेखि

बागमती। लामो समयदेखि बन्द रहेको हेटौँडा सिमेन्ट उद्योगले यही चैतको तेस्रो सातादेखि पुनःउत्पादन सुरु गर्ने भएको छ । उद्योगका मेसिनको मर्मत सम्भार सकिएको, उद्योगका लागि तत्काल चाहिने कच्चा पदार्थ सुनिश्चितता र कर्मचारी काम गर्न सहमत भएपछि उत्पादन सुरु गर्ने तयारी भइरहेको हेटौँडा सिमेन्ट उद्योगका निमित्त महाप्रबन्धक ईञ्जिनियर नविनकुमार कर्णले बताउनुभयो । “उद्योगको मेसिन पुरानो र बिग्रिसकेकाले त्यसलाई मर्मत सम्भार गर्न केही समय लाग्यो”, निमित्त महाप्रबन्धक कर्णले भन्नुभयो, “स्थापनाकालमा जडान गरिएको मेसिन हो, यसलाई विस्थापित गरेर नयाँ मेसिन जडान गर्नपुर्ने देखिन्छ तर आर्थिक समस्याका कारण तत्काल त्यो सम्भव नदेखिएपछि मर्मत गराएका छौँ ।” यसबाट तत्काल सिमेन्ट उत्पादन गर्न सकिने उहाँको भनाइ छ । उहाँका अनुसार उद्योग सञ्चालनका लागि आवश्यक कच्चा पदार्थ केही मौज्दात रहेको र केही आउने सुनिश्चितता भइसकेको छ । “अहिले हामीसँग करिब एक सय टन कोइला छ”, निमित्त महाप्रबन्धक कर्णले भन्नुभयो, “अरु कोइला भोलिदेखि आउने भएको छ, त्यसैले कच्चा पदार्थको खासै समस्या हँुदैन ।” कोइलाको पुरानो भुक्तानी हुन नसकेकाले कम्पनीसँग कुराकानी गरी उद्योग सञ्चालन गर्न कोइला पठाउन तयार भएको उहाँले बताउनुभयो । उद्योग सञ्चालनका लागि विद्युत् समस्या पनि समाधान हुने उहाँले बताउनुभयो ।

ई–गभर्नेन्स ब्लुप्रिन्टलाई थप प्रभावकारी र सुरक्षित बनाउन एनपीसर्ट र सीएसआरआई नेपालको जोड

काठमाडौं  । नेपाल सरकारको ई–गभर्नेन्स ब्लुप्रिन्ट २०८१ लाई थप प्रभावकारी र सुरक्षित बनाउन इन्फर्मेसन सेक्युरिटी रेस्पोन्स टिम नेपाल (एनपीसर्ट) र सेन्टर फर साइबरसेक्युरिटी रिसर्च एन्ड इनोभेसन (सीएसआरआई) नेपालले महत्वपूर्ण सुझाव दिएका छन् । यी दुई संस्थाले ई–गभर्नेन्स ब्लुप्रिन्टलाई थप समावेशी, प्रभावकारी र भविष्यमुखी बनाउन आफ्नो दृष्टिकोण र राय राखेका हुन् ।

प्रधानमन्त्री कार्यालय अन्तर्गतको ई–गभर्नेन्स बोर्डले विद्युतीय सुशासनमार्फत आर्थिक पारदर्शिता र प्रतिस्पर्धात्मकता बढाउने रणनीतिसहित ई–गभर्नेन्स ब्लुप्रिन्टको मस्यौदा ल्याएको थियो । यसमा सरोकारवालाका तर्फबाट सुझाव दिने क्रममा सीएसआरआई नेपाल र एनपीसर्टले संस्थागत संरचनाको सुदृढीकरणदेखि साइबर सुरक्षा र जोखिम व्यवस्थापनमा केन्द्रित हुनुपर्ने विषय उठाएका छन् ।

ओम मेगाश्री फर्मास्युटिकल्सको आइपीओ बाँडफाँट सम्पन्न, १ लाख ४७ हजार ६०० आवेदकलाई सेयर वितरण

काठमाडौं । ओम मेगाश्री फर्मास्युटिकल्स लिमिटेडको प्रारम्भिक सार्वजनिक प्रस्ताव (आईपीओ)आज मंगलबार (चैत १२ गते) बाँडफाँट भएको छ। यस आइपीओमा १ लाख ४७ हजार ६०० जना आवेदकहरुले गोलाप्रथामा १० कित्ताका दरले सेयर प्राप्त गरेका छन्।

बिक्री प्रबन्धक प्रभु क्यापिटलका अनुसार, यस आईपीओमा कुल २० लाख ५६ हजार ५७६ जनाले आवेदन दिएका थिए, जसमा २ लाख ८ हजार २७८ आवेदन रद्द भएको थियो। रितपूर्वक आवेदन दिएका १८ लाख ४८ हजार २९८ जनालाई गोलाप्रथामा सहभागी गराइएको थियो।

ओम मेगाश्री फर्मास्युटिकल्सले फागुन २७ देखि चैत ३ गतेसम्म सर्वसाधारणका लागि १४ लाख ७६ हजार कित्ता आईपीओ बिक्री खुला गरेको थियो। रेटिङ एजेन्सी केर रेटिङ नेपालले कम्पनीको आइपीओलाई ुकेयर एनपी बी माइनस रेटिङु प्रदान गरेको छ, जसले कम्पनीको दायित्व बहन गर्ने क्षमतामा मध्यमस्तरको जोखिम रहेको जनाउँछ।

हेटौँडा आन्तरिक राजस्व कार्यालयले आठ महिनामा रु ४ अर्ब २५ करोड २० लाख राजस्व सङ्कलन

बागमती ।  हेटौँडास्थित आन्तरिक राजस्व कार्यालयले चालू आर्थिक वर्षको आठ महिनामा रु चार अर्ब २५ करोड २० लाख राजस्व सङ्कलन गरेको छ । यो लक्ष्यको ८२ दशमलव ३२ प्रतिशत सङ्कलन भएको हो । 

कार्यालय प्रमुख युक्तप्रसाद सुवेदीका अनुसार आव २०८१÷८२ को आठ महिनामा रु पाँच अर्ब १६ करोड ५२ लाख ३२ राजस्व सङ्कलन गर्ने लक्ष्य रहेकामा रु चार अर्ब २५ करोड २० लाख ३७ हजार सङ्कलन भएको छ । 

कार्यालयले अन्तःशुल्कतर्फ रु दुई अर्ब ४१ कारेड ७४ लाख ४७ हजार, आयकरतर्फ रु ७३ करोड ५२ लाख ९२ हजार, मूल्यअभिवृद्धि करतर्फ रु ६१ करोड ४७ लाख ९९ हजार, स्वास्थ्य जोखिम करतर्फ रु ४१ करोड १३ लाख ५१ हजार, ब्याजकरतर्फ रु छ करोड २५ लाख ९८ हजार र बहालकरतर्फ रु एक करोड २५ लाख ५० हजार सङ्कलन गरेको छ ।

देशका अधिकांश भागमा मौसम सफा रहने पूर्वानुमान

काठमाडौँ ।हाल देशमा पश्चिमी तथा स्थानीय  वायुको आंशिक प्रभाव रहेको  जनाउँदै जल तथा मौसम विज्ञान महाशाखाले पहाडी भागमा आंशिक बदली भएको तथा  बाँकी भागको  मौसम  सफा रहेको बताएको छ । 

महाशाखाका अनुसार आज दिउँसो देशका पहाडी भागमा आंशिक बदली रही बाँकी भागको मौसम सफा रहने छ । कोशी र गण्डकी प्रदेशका पहाडी भागका एक–दुई स्थानमा मेघगर्जन र चट्याङसहित हल्का वर्षाका साथै उच्च पहाडी तथा हिमाली भागका एक–दुई स्थानमा हल्का हिमपातको सम्भावना छ ।

एक हप्तामा कर्मचारीले तलब पाएनन् भने सबैलाई टुकुचामा गाडिदिने बालेनको चेतावनी

काठमाडौं । काठमाडौं महानगरपालिकाका मेयर बालेन शाहले अबको एक हप्ताभित्र आफ्ना कर्मचारीहरूले तलब नपाए भने कठोर कदम चाल्ने चेतावनी दिएका छन्। सोमबार राति सामाजिक सञ्जालमा सार्वजनिक गरेको पोस्टमा शाहले काठमाडौं महानगरपालिकाको सरसफाई कर्मचारीहरूले विगत तीन महिनादेखि सरकारको उदासीनताका कारण तलब नपाएको भन्दै आक्रोश व्यक्त गरेका छन्।

‘काठमाडौं महानगरपालिकाको सरसफाई कर्मचारीले विगत ३ महिनादेखी तलब पाको छैन, सरकारको दम्भले,’ मेयर शाहले भनेका छन्, ‘को कोले के के आन्दोलन गर्ने हो, मलाई थाह छैन, अबको एक हप्तामा हाम्रो कर्मचारीले तलब पाएन भने सबैलाई टुकुचामा गाडदिन्छु !’

चैत्रकृष्ण एकादशीः पापमोचनी एकादशी व्रत गरिँदै

काठमाडौँ ।जीवनमा जानी नजानी गरेका पाप नाश गर्ने विश्वासका साथ आज पापमोचनी एकादशी व्रत गरिँदैछ । प्रत्येक वर्ष चैत्रकृष्ण एकादशीका दिन मनाइने पापमोचनी एकादशी व्रत आज भगवान् विष्णुको पूजा, आराधना गरी मनाउन लागिएको हो । 

यो एकादशीको माहात्म्य भगवान् श्रीकृष्णले महाराज युधिष्ठिरलाई र लोमस ऋषिले मान्धाता राजालाई बताउनुभएको थियो । पहिला वसन्त ऋतुका बेलामा अप्सराहरूले विहार गर्ने चैत्ररथ नाम गरेको वन थियो । त्यो वनमा च्यवन ऋषिको आश्रममा मेधावी नाम गरेका ऋषि तपस्या गरेर बस्नुभएको थियो । मञ्जुघोषा नामकी अप्सराले ऋषिलाई कामदेवको बसमा पारेर मोहित बनाउनुभयो । ऋषिको तपस्या समाप्त पार्दै आचार–विचार, तपस्या, नियम–आचरण सबै लोप बनाउनुभयो । स्वर्ग जान मेधावी ऋषिलाई बिन्ति गर्न लाग्नुभयो र ऋषि मोहमा पर्दै ‘तिमी आजै आएकी हौँ । अहिले मसँग बस र भोलि बिहान उज्यालो भएपछि जाउली’ भन्न थाल्नुभयो । ती दुवैको ५५ वर्ष, नौ महिना, तीन दिनसम्म रमण गर्दै बितेछ । अप्सराले जान्छु भनेपछि ऋषिले सन्ध्या गरुञ्जेल बस भनेको कथा विभिन्न पौराणिक ग्रन्थमा उल्लेख गरिएको सनातन विद्वत् परिषद् नेपालका सदस्य पण्डित बालमुकुन्द देवकोटाले राससलाई जानकारी दिनुभयो ।