काठमाडौँ । प्रहरीले भारतीय गुण्डा नाइके लरेन्स विश्नोई र अनमोल विश्नोईको नाममा  फिरौती माग गरेको आरोपमा माओवादी नेता शक्तिबहादुर बस्नेतलाई गोली हान्नेलाई पक्राउ गरेको छ ।पक्राउ पर्नेमा सुर्खेतको भेरीगंगा नगरपालिका–७ काठेघारीका ४१ वर्षीय रामबहादुर बिसी (बुढा क्षेत्री) रहेका  हुन् । पछिल्लो समय कोहलपुर नगरपालिका–५ मा डेरा गरी बस्दै आएका बिसी बाँकेमा पक्राउ परेका हुन् ।

इलाका प्रहरी कार्यालय कोहलपुर, बाँकेबाट खटिएको प्रहरी टोलीले उनलाई विश्नोईको नाम लिँदै पाँच करोड भारु (८ करोड नेपाली रुपैयाँ) फिरौती माग गरेको पाइएकोले पक्राउ गरिएको कोहलपुरका डीएसपी धर्मराज भण्डारीले जानकारी सार्वजनिक गरेका हुन् ।
सामाजिक सञ्जाल ह्वाट्स एप प्रयोग गरी उनले फिरौती माग गरेको आरोप लगाउँदै प्रहरीले  उनले विदेशी नम्बरको ह्वाट्स एपबाट फोन गरेर धम्क्याउने गरेको पाइएको जनाएको छ ।

पक्राउ परेका क्षेत्री पटकपटक पक्राउ परेर मुद्दा चलेका पुराना आपराधिक पृष्ठभूमिका व्यक्ति हुन् । प्रहरीको क्रिमिनल रेकर्ड सिस्टम (सीआरएस)मा उनको आपराधिक विगत सूचीकृत रहेको  छ ।
आपराधिक विगत अनुसार उनीविरुद्ध इलाका प्रहरी कार्यालय काँकडभिट्टाबाट २७ साउन २०६१ मा जीउ मास्ने बेच्ने उद्योगको कसुरमा मुद्दा चलेको थियो । त्यतिबेला एक नेपाली युवतीलाई ललाई फकाई विवाह गर्छु भन्दै काँकडभिट्टाबाट भारत लगेको आरोप छ ।

यस्तै ८ चैत २०६२ मा सर्वसाधारणलाई धम्की दिंदै चन्दा असुली गरेको आरोपमा जिल्ला प्रहरी कार्यालय झापाबाट उनीविरुद्ध मुद्दा चलेको थियो । यसको दुई वर्षपछि फिरौती रकम असुलेको आरोपमा काठमाडौंबाटै उनीविरुद्ध मुद्दा चलेको पाइएको छ ।

९ भदौ २०६४ मा महानगरीय प्रहरी परिसर काठमाडौं (हाल जिल्ला प्रहरी परिसर)बाट उनीविरुद्ध फिरौती लिएको आरोपमा मुद्दा चलेको थियो । एक व्यक्तिलाई नियन्त्रणमा लिएर ट्याक्सीमा राख्दै धम्क्याएर फिरौती असुलेको आरोप थियो ।

यसका साथै उनीविरुद्ध कर्तव्य कसुरको मुद्दामा पनि मुद्दा चलेको पाइएको छ । २०६४ मा भएको संविधानसभाको निर्वाचनमा एक व्यक्तिलाई गोली हानी हत्या गरेको आरोप उनीमाथि लागेको पुरानो रेकर्डमा देखिएको छ । २७ चैत २०६४ मा संविधानसभाका उम्मेदवार ऋषि शर्मा प्रचार प्रसार सकेर आउँदै गर्दा सुर्खेतको मेहलकुना जहरेबजार नजिक लोदे भन्ने ठाउँमा शर्माको गोली हानी हत्या भएको थियो । त्यसबेला इलाका प्रहरी कार्यालय छिन्चुबाट उनीविरुद्ध मुद्दा चलेको थियो ।

यसपछि पनि २०६५ चैतमा द्वन्द्वपीडित सेना प्रहरीको आन्दोलनको क्रममा प्रहरीको हतियार नै खोसेका थिए । यो केशमा उनीविरुद्ध काठमाडौंबाट मुद्दा चलेको थियो ।

अहिले पक्राउ परेका क्षेत्रीले यसअघि माओवादी केन्द्रका नेता शक्तिबहादुर बस्नेतलाई समेत गोली हानेका थिए । कोटेश्वरको निखिलेश्वर मन्दिरमा बस्नेतलाई उनले गोली हानेका हुन् । यो केशमा उनलाई ५ वर्ष जेल र ६० हजार जरिवाना तोकिएको थियो । जेल भुक्तान गरेर उनी २८ फागुन २०७० मा छुटेका थिए ।

उनी नेपाली आर्मीका भगौडा रहेको पाइएको छ । २०५९ सालमा जागिर छाडेर भागेका व्यक्ति रहेको पाइएको छ । सेनाको भगौडाभएर उनले विभिन्न नामले आपराधिक समूहमा लागेर अपराधको गतिविधि गर्दै आएको प्रहरीले जनाएको छ । आपराधिक क्रियाकलाप गर्ने उदेश्यले उनले भारतीय आधारकार्ड समेत लिएको पाइएको छ ।

क्षेत्रीले विश्नोईको नाम लिएर धम्क्याएका थिए । विश्नोई समूह भारतीय ग्याङ्स्टार हो । फिरौती माग्नेदेखि हत्यासम्ममा यो समूह संलग्न थियो । उनी सन् २०१४ देखि भारतीय कारागारमा छन् । २९ मे २०२२ मा पञ्जाबको संगर सिद्धु मुसेवालाको हत्या, भारतीय नायक सलमान खानलाई ज्यान मार्ने उद्योग गरेको, बाबा सिद्धिकी हत्या जस्ता आरोप विश्नोई समूहलाई लागेको छ ।यसबाट विश्नोइ चर्चित गुण्डा नाइके बनेका छन् ।

यता धम्कीका लागि नाम लिइएको अनमोल भने लरेन्स विश्नोईका भाइ हुन् । उनले पनि व्यायारी र उद्योगीसँग फिरौती माग्ने धम्क्याउने गरेको आरोप छ ।