May 12 2025 | २०८२, वैशाख ३०गते
काठमाडौँ । उपप्रधान तथा अर्थमन्त्री विष्णुप्रसाद पौडेलले विनियोजन विधेयक, २०८२ का सिद्धान्त र प्राथमिकता प्रस्तुत गरेका छन् ।संघीय संसदमा अर्थमन्त्री पौडेलले आर्थिक कार्यविधि तथा वित्तीय उत्तरदायित्व ऐन, २०७६ को व्यवस्था बमोजिम आर्थिक वर्ष २०८२/८३ का लागि विनियोजन विधेयकका सिद्धान्त र प्राथमिकता आइतबार प्रस्तुत गरेका हुन् ।
सीमित स्रोत साधनको परिचालनबाट विकास, सेवा प्रवाह र जनताको जीवनस्तरमा उल्लेखनीय सुधार भएको बताउँदै अर्थमन्त्री पौडेलले अहिले पनि मुलुकलाई राजनीतिक अस्थिरताबाट जोगाइ नीतिमा निरन्तरता, अर्थतन्त्रमा गतिशीलता र विकासमा तीव्रता हासिल गर्ने जिम्मेवारी बाँकी रहेको धारणा व्यक्त गरे ।
विकासको ढाँचा, गति र संस्कृति बदल्न, राष्ट्रिय आवश्यकता अनुरूपको आर्थिक सुधार गर्न, उद्यमशीलता, उत्पादन र रोजगारीका थप अवसर सिर्जना गर्दै मानवीय र भौतिक विकासमा तीव्रता दिन र लोकतान्त्रिक मूल्यमा आधारित समाजवाद उन्मुख स्वतन्त्र र समृद्ध अर्थतन्त्रको आधार तयार गर्न सम्पूर्ण स्रोत, साधन र सामथ्र्य परिचालन गर्नु जरुरी रहेको उनले जनाएका छन् ।
सरकारको नीति तथा कार्यक्रमको मार्गदर्शनमा आर्थिक वर्ष २०८२/८३ का लागि विनियोजन विधेयक प्रस्तुत गर्दा त्यसका सिद्धान्तलाई आधार बनाउन आवश्यक हुने बताउँदै अर्थमन्त्री पौडेलले संसदले पारित गरेको नीति तथा कार्यक्रम अनुरूप सिद्धान्तहरूका आधारमा रही बजेट आउने बताए ।
अर्थमन्त्री पौडेलले प्रस्ताव पेस गरेपछि सभामुख देवराज घिमिरेले त्यसमाथि वैशाख ३० र ३१ गते तथा जेठको १ र २ गते छलफल हुने मिति तय गरेको जानकारी सांसदहरूलाई गराएका हुन् ।
© 2025 All right reserved to Nayasadak.com | Site By : Sobij
