Jun 19 2025 | २०८२, असार ५गते
काठमाडौं। जल तथा मौसम विज्ञान विभागअन्तर्गत मौसम पूर्वानुमान महाशाखाले आज देशभर विभिन्न स्थानमा वर्षाको सम्भावना रहेको जनाएको छ। महाशाखाले बिहीबार बिहान ६ बजे जारी गरेको बुलेटिनअनुसार आज दिनभर देशका अधिकांश भूभागमा मौसम सक्रिय रहनेछ।
दिउँसोको समयको लागि गरिएको अनुमानअनुसार, देशका सबै प्रदेशमा कतैकतै मेघगर्जन र चट्याङसहित हल्कादेखि मध्यम वर्षा हुन सक्छ। विशेषगरी कोसी, बागमती, गण्डकी र लुम्बिनी प्रदेशका केही स्थानहरूमा भारीदेखि धेरै भारी वर्षा हुने सम्भावना औंल्याइएको छ। साथै, उच्च पहाडी तथा हिमाली क्षेत्रका थोरै स्थानमा हल्का वर्षा वा हिमपात हुन सक्ने सम्भावना पनि उल्लेख गरिएको छ।
रातिको मौसम पनि उस्तै रहने देखिएको छ। कोसी, बागमती, गण्डकी, लुम्बिनी र सुदूरपश्चिम प्रदेशका केही भागहरूमा राति पनि मेघगर्जनसहित वर्षा जारी रहने अनुमान गरिएको छ। साथै, मधेस प्रदेशसमेत कोसी र लुम्बिनीसँगै भारीदेखि धेरै भारी वर्षाको जोखिममा पर्ने देखिएको छ।
मौसमविद्हरूका अनुसार, २४ घण्टाभित्र हुने वर्षाको मात्रा अनुसार वर्षा वर्गीकरण गरिएको छ—१० मिलिमिटरसम्मको वर्षा ‘हल्का’, १० देखि ५० मिलिमिटरसम्म ‘मध्यम’, ५०–१०० मिलिमिटर ‘भारी’, १००–२०० मिलिमिटर ‘धेरै भारी’, र २०० मिलिमिटरभन्दा बढीलाई ‘अति भारी वर्षा’ मानिन्छ।
यस्तै, बुलेटिनमा क्षेत्रफलका आधारमा वर्षा हुने सम्भावनालाई पनि छुट्टाछुट्टै रूपमा परिभाषित गरिएको छ। १० प्रतिशतभन्दा कम क्षेत्रमा वर्षाको सम्भावना भएमा ‘एक-दुई स्थानमा’, १०–३० प्रतिशतबीच भए ‘थोरै स्थानमा’, ३०–५० प्रतिशतमा ‘केही स्थानमा’, ५०–८० प्रतिशतमा ‘धेरै स्थानमा’ र ८० प्रतिशतभन्दा बढी क्षेत्रमा सम्भावना देखिएमा ‘अधिकांश स्थानमा वर्षा’ हुने भनिन्छ।
हाल मनसुन प्रणाली कोसी, मधेस, बागमती, गण्डकी र लुम्बिनी प्रदेशका केही भागमा सक्रिय रहेको र बाँकी स्थानमा पश्चिमी वायु तथा स्थानीय वायुले प्रभाव पारेको मौसम विभागले जानकारी दिएको छ।
© 2025 All right reserved to Nayasadak.com | Site By : Sobij
