काठमाडौं । पूर्व पश्चिमबाट पैदल यात्रा गरी काठमाडौंमा न्याय माग्न हिँडेका मिटरब्याजी पीडितहरू काठमाडौं प्रवेश गर्न लागेका छन् । न्याय मार्च नाम दिएर निस्किएका मिटरब्याजी पीडितहरुले न्याय नपाएको भनी पूर्व पश्चिमबाट पैदल हिँडेर भरतपुरमा एकीकृत भई  निर्णायक आन्दोलनका लागि काठमाडौंमा आउन लागेका हुन् ।
हिजो धादिङको पिपलटार आइपुगेका उनीहरु आज काठमाडौं प्रवेश गरिसक्ने सहभागीहरूले जनाएका छन् ।

उनीहरुले गएको माघ १६ गते शहीद दिवसको दिन झापा र कञ्चनपुरबाट एउटै समयमा पैदलयात्रा शुरु गरेका थिए । १७ दिन हिँडेर फागुनको ३ गते चितवनको नारायणगढमा भेला भए । त्यसपछि काठमाडौंतर्फ अगाडी बढेका  थिए ।

मधेसका २० जिल्ला र अरु ८ जिल्लाका पीडित न्याय मार्चमा छन् । फर्जी तमसुक, चेकलाई अवैध घोषणा गरेर क्षतिपूर्ति दिनुपर्ने, समस्या समाधान गर्न न्यायिक आयोग गठन गर्नुपर्नेलगायत उनीहरुका माग छन् । यसअघि गएको वर्ष चैत १२ गते मिटरब्याजी पीडितहरु महोत्तरीको बर्दिबासबाट ११ दिन हिँडेर काठमाडौं आएका थिए ।पीडितहरुको धर्ना, प्रदर्शन र दबाबपछि सरकारले सम्झौता गर्दै चैत अन्तिममा मिटरब्याजी पीडितको समस्या समाधान गर्न तीन सदस्यीय जाँचबुझ आयोग गठन गरेको थियो । विशेष अदालतका पूर्वअध्यक्ष गौरीबहादुर कार्की संयोजकत्वको जाँचबुझ आयोगले गएको मंसिरमा सुझावसहित प्रतिवेदन सरकारलाई बुझाएको थियो ।

करिब २८ हजार उजुरी लिएको आयोगले ५ हजार उजुरीमा मिलापत्र पनि गराएको थियो । तर आफूहरुको समस्या समाधानका लागि गठन भएको आयोगले काम नगरेको र आफूहरुका समस्या सरकारले नसुनेको कारण फेरि हिँडेर काठमाडौसम्मको यात्रा गर्नुपरेको मिटरब्याजी पीडित संघर्ष समितिका केन्द्रीय अध्यक्ष अवधेश कुशवाहले पीडितहरूको भनाइ सार्वजनिक गरेका छन् ।

पैदलयात्रा गरिरहेका पीडितहरु काठमाडौंको शान्तिवाटिकामा बस्ने तयारीमा छन् ।  काठमाडौं महानगरपालिकाले काठमाडौं शान्तिवाटिकामा आश्रयलिइ बसेका पीडितहरूलाई बाहिर निकाल्न लगाएको थियो । यसअघि पनि पीडित र महानगरपालिका प्रशासनबीचको भिडन्त भइसकेकोमा आउने पीडितहरूको भिडन्त महानगर प्रशासनसँगै हुने हो कि महानगरले उनीहरूको बसाइको व्यवस्था गर्ने हो त्यो सबैको चासोको विषय बनेको छ ।पैदल हिँडेर आइरहेकाहरूले रात सार्वजनिकस्थलहरूमै बिताउँदै आएकाले उनीहरूले काठमाडौ आएपनि बसाइका लागि सार्वजनिकस्थल नै खोज्ने भएका छन् ।