Sep 11 2025 | २०८२, भदौ २६गते
काठमाडौं । सुनको अवैध पैठारी (तस्करी) नियन्त्रणसम्बन्धी जाँचबुझ आयोगले थप १५ दिन समय मागेको छ ।दिइएको समयमा काम पूरा हुन नसक्ने जनाउँदै आयोगले थप १५ दिनको समय मागेको हो ।
सरकारले १५ असोजमा ३ महिना समय दिएर गठन सो आयोग गठन गरेको थियो । आयोगले तोकिएको समयमा काम पूरा नगरेपछि फेरि २ महिना समय थप गरिएको थियो । थपिएको सो २ महिनाको समयमा पनि आयोगले काम पूरा गर्न नसक्ने देखिएर समय माग गरिएको हो । यस अघि थपिएको २ महिनाको अवधि १५ फागुनमा सकिन लागेको छ ।
आयोगका अध्यक्ष डिल्लीराज आचार्यले १५ फागुनसम्म प्रतिवेदन प्रस्तुत गर्न केही समय अपुग हुने हुँदा फागुन मसान्तसम्मको समय माग गरेका हुन् । उनले जारी गरेको विज्ञप्तिमा भनिएको छ ‘यसर्थ यही फागुन मशान्तभित्र प्रतिवेदन प्रस्तुत गर्ने गरी अवधि थप हुन अनुरोध गरी गृह मन्त्रालयमार्फत नेपाल सरकार (मन्त्रिपरिषद) समक्ष अनुरोध गरिएको व्यहोरा सम्बन्धित सबैमा जानकारी गराइन्छ’ ।
त्रिभुवन विमानस्थल भन्सार कार्यालयबाट गत साउनमा ६० किलो भन्दा बढी सुन तस्करी भएको पाइएको थियो । त्यसपछि प्रमुख प्रतिपक्षी दल नेकपा एमालेले उच्चस्तरीय छानबिनको माग गरी लगातार संसद अवरोध गरेको थियो । संसद अवरोध भएपछि प्रमुख राजनीतिक दलहरुबीच आयोग बनाउने सहमति भएको थियो । सो सहमति अनुसार सरकारले १५ असोजमा पूर्वन्यायाधीश डिल्लीराज आचार्यको अध्यक्षतामा जाँचबुझ आयोग गठन गरेको थियो । सो आयोगमा किशोरजंग कार्की, प्रेमराज जोशी र सहकुल थापा सदस्य रहेका छन् ।
आयोगले राजस्व अनुसन्धान विभाग, प्रहरीको केन्द्रीय अनुसन्धान ब्यूरो, सुन तस्करीमा संलग्नको अभियोग लागेका १०० भन्दा बढी व्यक्तिसँग बयान र सोधपुछ गरिसकेको छ ।थपिएको १५ दिन अवधिमा आयोग प्राप्त प्रमाणहरुको अध्ययन, विश्लेषण गरी प्रतिवेदन तयारीमा लगाउने बताएको छ ।
© 2025 All right reserved to Nayasadak.com | Site By : Sobij
