काठमाडौ ।सरकारले क्यासिनोबाट १ अर्ब ३३ करोड ७८ लाख ९२ हजार २सय रुपैयाँ राजस्व संकलन गरेको छ ।गत असार मसान्तसम्म २१वटा क्यासिनोले राजस्व बुझाएर दर्ता नवीकरण गराएबाट सो राजस्व संकलन भएको हो ।
पर्यटन विभागका अनुसार सरकारले सबै क्यासिनो तथा मनोरञ्जन खेल सञ्चालनको लाइसेन्स प्राप्त कम्पनीलाई २०८१ असार मसान्तभित्र राजस्व बुझाउन अल्टिमेटम दिएको थियो । दिइएको समयमै राजस्व नबुझाउने कम्पनीको दर्ता खारेज गर्ने चेतावनी पनि दिइएको थियो ।
होटल, पर्यटन तथा क्यासिनो दर्ता, नवीकरणको जिम्मेवारी पर्यटन विभागले जनाए अनुसार ८ वटा ठुला क्यासिनोबाट ४० करोड रुपैयाँ राजस्व र १० करोड रुपैयाँ नवीकरण दस्तुर उठेको छ । यसैगरी १३ वटा साना तथा मझौला खालका आधुनिक मेसिन वा उपकरणको माध्यमबाट मात्र खेलाइने क्यासिनोबाट १९ करोड ५० लाख रुपैयाँ राजस्व र ६ करोड ५० लाख रुपैयाँ नवीकरण शुल्क उठेको छ ।
