काठमाडौँ । बर्खा लागेयता हालसम्म कुल रोपाइँ हुने क्षेत्रफलको ९६ प्रतिशत बढीमा रोपाइँ भएको छ ।मनसुन देशमा सक्रिय भएयता करिब साढे १३ लाख हेक्टरमा धान रोपाइँ भएको हो ।पशुपन्छी विकास मन्त्रालयका अनुसार १४ लाख १ हजार २ सय ७३.७३ हेक्टरमा रोपाइँ हुन्छ । त्यस मध्ये साउन २० गतेसम्म१३ लाख ४९ हजार ६ सय ७.४ हेक्टरमा धान रोपाइँ भएको हो । यो कुल रोपाइँ हुने क्षेत्रफलको ९६.३ प्रतिशत हो ।गत वर्ष २०८० साउन १९ सम्म ८१.८ प्रतिशत मात्र रोपाइँ भएको थियो ।
मन्त्रालयको तथ्यांकअनुसार आर्थिक वर्ष २०८०÷८१ मा ५७ लाख २४ हजार २ सय ३४ टन धान उत्पादन भएको थियो । अहिले उत्पादन थप बढ्न सक्ने मन्त्रालयको अनुमान छ । मन्त्रालयका विवरण अनुसार २०८० साउन १९ सम्म ९९.२ प्रतिशत रोपाइँ भएकोमा यो वर्ष सुदूरपश्चिम प्रदेशमा शतप्रतिशत रोपाइँ भइसकेको छ । सुदूरपश्चिममा १ लाख ७४ हजार ५ सय ७६ हेक्टरमा धान रोपाइँ हुन्छ ।
गत वर्ष साउन १९ सम्म कर्णालीमा ९६.३ प्रतिशत रोपाइँ भएको कर्णाली प्रदेशमा ९९.२ प्रतिशत रोपाइँ भएको छ । कर्णालीमा ४१ हजार ९ सय ४ हेक्टरमा रोपाइँ हुन्छ । अन्य प्रदेशमा पनि ९५ प्रतिशत बढी रोपाइँ भइसकेको छ । धान उत्पादनको राजधानी मानिने सबैभन्दा बढी धान रोपाइँ हुने मधेश प्रदेशमा ९५.४ प्रतिशत रोपाइँ भएको छ । मधेशमा ३ लाख ८६ हजार १ सय ५० हेक्टरमा रोपाइँ हुन्छ । साउन २० सम्म ३ लाख ६८ हजार ३ सय ८३ हेक्टरमा रोपाइँ भइसकेको छ ।
