काठमाडौँ । प्रधानमन्त्री केपी शर्मा ओलीले संविधानका आधारभूत मूल्य र मान्यता यथावत राखेर सर्वस्वीकार्य संशोधन गर्न सकिने बताएका छन् । प्रतिनिधिसभाको बुधबारको बैठकमा प्रधानमन्त्री ओलीले संविधान संशोधन गर्दा समावेशितालगायतका विषयमा पनि ख्याल गरिने बताएका हुन् ।
प्रधानमन्त्री ओलीले संविधान स्वीकार्यता र अस्वीकार्यताको रेखामा विभाजन गर्ने गरी होइन सर्वस्वीकार्य बनाउने प्रयासअन्तर्गत पनि संशोधन गर्न सकिने र गर्नुपर्छ भनिएको बताए ।जनताको जनजीवनमा कसरी सकरात्मक परिवर्तन ल्याउन सकिन्छ भन्नका खातिर संविधान संशोधन गर्न खोजिएको बताउँदै प्रधानमन्त्री ओलीले जनचाहनाविपरीत संविधान संशोधन हुनै नसक्ने बताए ।
