काठमाडौँ । सरकार र ग्रेनाइट /मार्बल उद्योगी व्यवसायी बीच टसल भएको छ ।मुख्यतः कच्चा पदार्थको रूपमा भित्रँदै आएको ग्रेनाइटलाई सरकारले भन्सार मूल्यांकनमा फिनिस्ट ग्रेनाइट सरह मूल्यांकन लगाएपछि सरकार र ग्रेनाइट /मार्बल उद्योगी व्यवसायीबीच टसल भएको हो ।
सरकारले भन्सार मूल्यांकनमा करौँतीद्वारा अलिअलि ताछिएको वा अरू किसिमले काटिएको भन्दा कच्चा किसिमले काटेको एक ढिक्का ढुंगा, (ग्रेनाइट)लाई कच्चा पदार्थको रूपमा लिएको छ । यस्तो एक ढिक्का कच्चा पदार्थको रूपमा आएको ग्रेनाइटलाई भन्सारले १० प्रतिशत भन्सार मूल्यांकन र १३ प्रतिशतभ्याटमा छुटाउँदै आएको छ । विगतमा भन्सार कार्यालयहरूले अर्धतयारी ग्रेनाइट र मार्बललाई समेत कच्चा पदार्थको रूपमा छुटाउँदै आएका थिए ।
पछिल्लो समय ग्रेनाइट मार्बलका उद्योगी व्यवसायीहरूले भन्सार दरबन्दी , अन्तशुल्क छल्नका लागि अर्धतयारी र तयारी वस्तुहरू कच्चा पदार्थको रूपमा आयात गर्ने गरेको पाइएको बताउँदै भन्सार विभागले कडाइका साथ चारपाटे काटिएका , मिलाएर केवल चिरान मात्र नभएका वर्गाकार अर्ध तयारी ग्रेनाइट मार्बलहरूको मूल्यांकनमा कडाइ गरिएकोे जनाएको छ ।
पछिल्लो समय उद्योगी व्यवसायीहरूले कच्चा पदार्थको रूपमा यसअघि आयात गर्दै आएका मार्बल ग्रेनाइटहरूको मूल्यांकनमा भन्सारले २० प्रतिशत भन्सार मूल्यांकन , २५ प्रतिशत अन्तःशुल्क र १३ प्रतिशत मूल्य अभिवृद्धि कर लगाएपछि उद्योगी व्यवसायीहरूले कच्चा पदार्थको रूपमा आयात गरिएका सयौँ ग्रेनाइट लोडेड ट्रकहरू सीमापारी रोकिएका छन् । केही व्यवसायीहरूले भन्सार यार्डमा आइसकेका गाडीहरू उद्योगी व्यवसायीहरूले घोषणा गरेको मूल्यांकनमा छाड्न नमानेपछि धरौटीमा समेत छुटाएका छन् ।
मूल्यांकनमा टसल भएपछि ग्रेनाइट मार्बलका उद्योगी व्यापारीहरू एकताबद्ध भएर सरकारलाई १० प्रतिशत भन्सार मूल्यांकन र १३ प्रतिशत भ्याटमा मात्र ग्रेनाइट मार्बलको कच्चा पदार्थ छुट दिनुपर्ने लबिङमा छन् ।अहिले छिटफुट बाहेक ग्रेनाइट मार्बल भन्सारबाट छुटाउने काम ठप्प प्रायः भएको भन्सार कार्यालयहरूले नयाँ सडकलाई बताएका छन् ।
भैरहवा भन्सार कार्यालयका सूचना अधिकारी नरेन्द्र चौधरीका अनुसार मूल्यांकनको विषयमा उद्योगी व्यवसायीले घोषणा गरेको मूल्य र भन्सारको कुरा नमिल्दा अहिले भैरहवा भन्सारबाट ग्रेनाइट मार्बल आएको छैन् । स्मरणीय रहोस ग्रेनाइट मार्बल भैरहवा भन्सार कार्यालयबाट अत्यधिक आउने गरेको छ । सरकारले कच्चा ग्रेनाइट /मार्बलको र फिनिस्टग्रेनाइट /मार्बलको करमा ठुलो अन्तर राखेपछि ठुलो संख्यामा मार्बल ग्रेनाइट रिफाइनरी उद्योगहरू सञ्चालनमा थिए । र, केही सञ्चालनको तयारीमा छन् ।
सरकारले एकाएक अर्ध तयारी(कच्चा पदार्थ)ग्रेनाइट /मार्बलको भन्सार दरबन्दी बढाएपछि त्यस्ता उद्योगहरू बन्द हुने अवस्थामा पुगेका छन् । सरकारले कच्चा पदार्थमा आएका ग्रेनाइट मार्बलहरूको एकाएक कर र भन्सार दरबन्दी बढाएपछि ग्रेनाइट मार्बल उद्योगी व्यवसायीहरू लगानी जोखिममा पर्ने भयले तनावमा छन् । यससम्बन्धमा भन्सार विभागका महानिर्देशक हरिशरण पुडासैनीले आफू भरखर भरखर भन्सारमा आएकोले विषयवस्तु राम्रोसँग बुझिननसकेको नयाँ सडकसँगको कुराकानीमा बताए ।
