काठमाडौँ । चालु आर्थिक वर्ष २०८१।०८२ को पहिलो महिना साउनमा एक अर्ब ५४ करोड ११ लाख रुपैयाँ बढीको बीमा त्याग (सरेण्डर) भएको छ । १० हजार २९३ जना बीमितले उक्त रकम बराबरको बीमा सरेण्डर गरेका हुन् ।
सबैभन्दा धेरै बीमा सरेण्डर गरेकाहरूले लाइफ इन्स्योरेन्स कर्पाेरेशन (एलआईसी) बीमितहरू छन् । एलआईसीका २ हजार ७१५ जना बीमितले साउन महिनामा ५१ करोड ३४ लाख रुपैयाँ बढीको बीमा सरेण्डर गरेका हुन् ।
यस्तै नेपाल बीमा प्राधिकरण अनुसार नेपाल लाइफबाट २ हजार ७ सय ३१ बीमितले ४८ करोड ४१ लाख रुपैयाँ बढीको बीमा सरेण्डर गरेका छन् ।एसियन लाइफका ९ सय ७९ बीमितले १३ करोड ५५ लाख रुपैयाँ, राष्ट्रिय जीवन बीमा कम्पनीका ७ सय ६७ बीमितले ७ करोड ८७ लाख रुपैयाँ र हिमालयन लाइफ इन्स्योरेन्सका ८ सय ४७ बीमितले ७ करोड ७ लाख रुपैयाँ बढीको बीमा सरेण्डर गरेका छन् ।
सन लाइफ नेपाल र प्रभु महालक्ष्मी लाइफमा सबै भन्दा कम सरेन्डर गर्नेहरू रहेका छन् । सन लाइफका ६९ जना बीमितले ५७ रुपैयाँ बराबरको बीमा सरेण्डर गरेका छन् भने प्रभु महालक्ष्मीका ८७ बीमितले १ करोड ५ लाख रुपैयाँ बराबरको बीमा सरेण्डर गरेका छन् ।
