Sep 15 2025 | २०८२, भदौ ३०गते
काठमाडौँ । नेपाल धितोपत्र बोर्ड (सेबोन) ले ‘साना तथा मझौला संगठित संस्थाको धितोपत्र निष्काशन तथा कारोबार नियमावली, २०८१’ कार्यान्वयनमा ल्याएको छ । बोर्डले बिहीबार नियमावली लागु भएको जनाएको हो । यो नियमावलीसँगै अब साना तथा मझौला संगठित संस्था (एसएमइज) ‘प्लेटफर्म’ मा प्रवेश गर्ने भएका हुन् ।
बोर्डका अनुसार लगानीकर्ताले एसएमइजको आईपीओमा अब कम्तीमा पाँच सय कित्ताका लागि आवेदन गर्नुपर्ने भएको छ । सेबोनले यसअघि तयार पारेको मस्यौदामा न्यूनतम साढे दुई सय कित्ता आवेदन दिनुपर्ने उल्लेख गरेको थियो ।
एसएमईजले जारी पूँजीको ३० देखि ४९ प्रतिशतसम्म आईपीओ जारी गर्न सक्ने नियमावलीमा व्यवस्था गरेको छ । आईपीओ जारी गर्नुअघि १५ प्रतिशत संस्थागत लगानीकर्ता र ५ प्रतिशत मर्चेन्ट बैंकरले खरिद गरेको हुनुपर्ने व्यवस्था नियमावलीमा प्रावधान राखिएको छ । दुवैले खरिद गरेको शेयरको ‘लकइन पिरियड’ तीन वर्ष राखिएको छ ।सेबोनले चैत २०७९ मा मस्यौदा बनाएर अर्थ मन्त्रालय पठाएको थियो । तर, ९ पुस २०८१ मा बसेको मन्त्रिपरिषद् बैठकले यो नियमावली स्वीकृत गरेको हो ।
नियमावलीमा रेटिङ आवश्यक परेमा बोर्डले रेटिङ गराउन निर्देशन दिन सक्ने उल्लेख गरिएको छ। रेटिङ नगरी पनि शेयर निष्काशन गर्न सक्नेछ ।यो नियमावलीलाई आवश्यक कारबाही गर्न सेबोनले नेपाल स्टक एक्स्चेन्ज (नेप्से) र सीडीएस एन्ड क्लियरिङ लिमिटेडलाई पत्राचार गरेको छ ।
© 2025 All right reserved to Nayasadak.com | Site By : Sobij
