Oct 30 2025 | २०८२, कात्तिक १३गते
काठमाडौँ । उपप्रधानमन्त्री तथा अर्थमन्त्री विष्णु प्रसाद पौडेलले भन्सारको राजस्व संकलन लक्ष्य कुनै पनि हालतमा पुरा हुनुपर्ने बताएका छन् । ७३ औँ अन्तर्राष्ट्रिय भन्सार दिवसको अवसरमा आयोजित कार्यक्रममा अर्थमन्त्री पौडेलले यस्तो बताएका हुन् ।गत आर्थिक वर्षको तुलनामा यसपाली भन्सार बढ्यो भन्नेमा नरमाइ यसपालीको लक्ष्य अनुसार नै सकंलन हुनुपर्नेमा जोड दिनुपर्ने उनले बताए । उनका अनुसार राजस्व संकलनको हिसाब चापमा छ । यो कुरा भन्सार विभागका कर्मचारीहरुले बुझ्नुपर्छ । विगतको तुलनामा धेरै कर उठाइयो भनेर मात्रै पुग्दैन् । यसपालीको लक्ष्य अनुसार भन्सार महशुल उठाउनै पर्ने भएको छ ।
लक्ष्य अनुसार भन्सार उठाउन सकिने अवस्था यस वर्ष रहेको र त्यसमा कर्मचारीहरुले इमानदारीपूर्वक काम गर्नुपर्नेमा पनि जोड दिँदै मन्त्री पौडेलले भने ‘मेरो अनुमानमा हामी लक्ष्य पूरा गर्न सक्ने अवस्थामा यस वर्ष छौं यसमा कर्मचारीहरु इमानदार भएर लाग्नुपर्छ । अहिलेको सरकार एक थान सरकार थपियो भन्ने मात्रै होइन । यो सरकार काम गर्नका लागि आएको हो ।’ उनले अध्यादेशहरुका कारण निजी क्षेत्रमा उत्साह जागेको बताउँदै यो सुधारको प्रयास मात्रै भएको र अझै ठूला सुधारहरु गरिने बताए । उनका अनुसार निजी क्षेत्रका साथीहरुले अध्यादेशको स्वागत गरिरहनु भएको छ । यो निजी क्षेत्रको गरिएको अन्तिम प्रयास होइन । यो सुरुवात मात्रै हो ।
निजी क्षेत्रले पनि राजस्व चुहावट रोक्न सहयोग गर्नुपर्ने उनले बताए । निजी क्षेत्रका छाता संस्थाहरुले आफ्ना सदस्यहरुलाई राजस्व तिर्न प्रेरित गर्नुपर्ने मन्त्री पौडेलले बताए ।
© 2025 All right reserved to Nayasadak.com | Site By : Sobij
