Apr 03 2025 | २०८१, चैत २१गते
काठमाडौं । सरकारले अर्थ मन्त्रालय मातहतका १४ सहसचिवको एकैपटक सरुवा र जिम्मेवारी हेरफेर गरेको छ । सरकारले अर्थ मन्त्रालय मातहतका १४ सहसचिवको जिम्मेवारी हेरफेर गर्ने निर्णय गरेको हो ।
अर्थ मन्त्रालय स्रोतका अनुसार महेश भट्टराईलाई भन्सार विभागको महानिर्देशकको जिम्मेवारी दिइएको छ। उनी मन्त्रालयकै योजना अनुगमन तथा मूल्याङ्कन महाशाखामा थिए । यस्तै आन्तरिक राजस्व विभागको महानिर्देशकमा मदन दाहालको सरुवा भएको छ। दाहाल हाल मन्त्रालयकै प्रशासन महाशाखा प्रमुख थिए। थानप्रसाद पंज्ञानीको वित्तीय संघीयता समन्वय महाशाखाबाट प्रशासन महाशाखामा सरुवा भएको छ। शोभाकान्त पौडेललाई सार्वजनिक वित्त व्यवस्थापन तालिम केन्द्रबाट आर्थिक नीति विश्लेषण महाशाखाको जिम्मेवारी दिइएको छ। सहसचिव महेश आचार्यको आर्थिक नीति विश्लेषण महाशाखाबाट सार्वजनिक वित्त व्यवस्थापन तालिम केन्द्रमा सरुवा भएको छ।
यस्तै, तीर्थराज चिलुवाललाई आन्तरिक राजस्व विभागको उपमहानिर्देशकको जिम्मेवारी दिइएको छ। वित्तीय व्यवस्थापन तथा संस्थान समन्वय महाशाखाको जिम्मेवारी सेवन्तक पोखरेललाई तोकिएको छ। सहसचिव पार्वती अर्याललाई प्रमुख भन्सार परीक्षण प्रशासकको जिम्मेवारी दिइएको छ।
त्रिभुवन विमानस्थल भन्सार कार्यालय प्रमुख रहेका महेश बरालको अर्थ मन्त्रालयमा सरुवा भएको छ। भन्सार विभागका उपमहानिर्देशक यमुना प्रधानलाई महालेखा नियन्त्रकको कार्यालयमा सरुवा गरिएको छ।
आन्तरिक राजस्व विभागका उपमहानिर्देशक गोपीकृष्ण कोइरालालाई सार्वजनिक ऋण व्यवस्थापन कार्यालयको प्रमुखमा सरुवा गरिएको छ। सार्वजनिक ऋण व्यवस्थापन कार्यालयको प्रमुख अमृत लम्साललाई भन्सार विभागको उपमहानिर्देशकको जिम्मेवारी दिइएको छ।
यस्तै महालेखा नियन्त्रक कार्यलयका सहमहालेखा नियन्त्रक श्यामप्रसाद भण्डारीलाई अर्थ मन्त्रालयको योजना अनुगमन तथा मूल्याङ्कन महाशाखामा सरुवा गरिएको छ। सूचना प्रविधि विज्ञ श्रीचन्द्र साहलाई आन्तरिक राजस्व विभागमा सरुवा गरिएको छ।
© 2025 All right reserved to Nayasadak.com | Site By : Sobij
