काठमाडौँ । काठमाडौँको शंखरापुर नगरपालिका–३ बोझिनीमा ४०० केभी लप्सीफेदी सबस्टेसन निर्माण कार्यलाई तीव्रता दिइएको छ।नेपाल विद्युत प्राधिकरणले  तामाकोशी तथा सुनकोशी नदी र तिनीहरुका सहायक खोलाहरुमा निर्माण भएका तथा निर्माण हुने जलविद्युत आयोजनाहरुबाट उत्पादित विद्युत् काठमाडौँ उपत्यकामा ल्याउन र स्थानीयरुपमा आपूर्तिका लागि ‘ग्यास इन्सुलेटेड सबस्टेसन (जीआईएस) प्रविधिमा आधारित ४००/२२०, २२०/१३२ र १३२/११ केभी तहको लप्सीफेदी सबस्टेसन निर्माण कार्यलाई तीव्रता दिएको हो।

करिब एक वर्षअघि सुरु भएको सबस्टेसन आगामी पुसभित्र निर्माण गरिसक्ने लक्ष्य लिइएको छ। करिब १७२ रोपनी जग्गामा निर्माण भइरहेको लप्सीफेदी सबस्टेसन काठमाडौँ उपत्यकामा विद्युत् आपूर्तिका लागि सबैभन्दा ठूलो केन्द्र हो ।खिम्ती–बाह्रबिसे–लप्सीफेदी सबस्टेसन आयोजना अन्तर्गत ४००/२२० केभी लप्सीफेदी सबस्टेसनको नियन्त्रण कक्ष, जीआइएसका उपकरणहरु रहने भवन लगायत सिभिल संरचनाहरुको निर्माण एक तिहाई बढी  प्रतिशत सकिएको छ।

सबस्टेसनमा रहने पावर ट्रान्सफर्मर,जीआईएस, कन्ट्रोल प्यानललगायत सम्पूर्ण उपकरणहरुको आपूर्ति दुई तिहाइ बढी भइसकेको छ। आयोजनाअन्तर्गतका खिम्ती र बाह्रबिसे सबस्टेसनको  निर्माण कार्य भइरहेको छ । 

तामाकोशी–काठमाडौं प्रसारणलाइन आयोजनाअन्तर्गत २२०/१३२ र १३२/११ केभी तहका सबस्टेसनका सिभिल संरचनाहरुको निर्माण कार्य आधा भन्दा बढी सकिएको छ। उपकरणहरुको आपूर्ति करिब करिब भइसकेको केही मात्र बाँकी रहेको प्राधिकरणले जनाएको छ। सिभिल संरचनाहरुको निर्माण सम्पन्न भएपछि सबस्टेसनमा उपकरण जडान सुरु हुनेछ। निर्माण कार्य समयमै पूरा गराउन र मातहतका कर्मचारीहरूको र सम्बद्ध निर्माण व्यवसायीका जिम्मेवार व्यक्तिहरूको हौसला अभिवृद्धि गर्न नेपाल विद्युत प्राधिकरणका प्रबन्ध निर्देशक कुलमान घिसिङले बुधबार सबस्टेसन निर्माणस्थलको अनुगमन गरेका थिए ।  जनशक्ति अझै थप गरी तोकिएकै समयमा काम सम्पन्न गर्न आयोजना व्यवस्थापन र निर्माण व्यवसायीहरुलाई निर्देशन दिए।

घिसिङका अनुसार स्थानीय समस्याका कारण सबस्टेसन निर्माणमा केही ढिला भयो तर हालसम्मको निर्माण कार्यको प्रगति सन्तोषजनक नै देखिएको  छ ।स्थानीयबाट सडक मर्मत तथा विस्तार, खानेपानी योजना, विद्यालय भवन, खेल मैदान, गुम्बा निर्माण, स्थानीयलाई रोजगारीलगायत जायज मागलाई आयोजना निर्माणका क्रममा संस्थागत सामाजिक उत्तरदायित्व  (सीएसआर)अन्तर्गत सम्बोधन गरिँदै गरिएको र गरिने घिसिङले भनेको सम्बद्ध स्रोतको भनाइ छ ।

तामाकोशी–काठमाडौं २२०/४०० केभी प्रसारण लाइन आयोजना अन्तर्गत रामेछापस्थित नयाँ खिम्ती सबस्टेसनबाट सिन्धुपाल्चोकको बाह्रबिसे हुँदै काठमाडौँ आउने ४०० केभी प्रसारण लाइन लप्सीफेदी सबस्टेसनमा जोडिने छ।प्रसारण लाइन आयोजनाअन्तर्गत खिम्ती–बाह्रबिसे खण्डमा पर्ने सम्पूर्ण टावर खडा गरिसकिएको छ। करिब तीन किलोमिटर मात्र तार तान्न बाँकी रहेको छ। बाह्रबिसे–लप्सीफेदी लाइन खण्डमा पर्ने १२२ टावरमध्ये २ वटाको मात्र निर्माण बाँकी छ। टावरहरु लप्सीफेदी क्षेत्रमै पर्छन्। करिब ४२ किलोमिटर तार तानिसकिएको छ।

तामाकोशी–काठमाडौँ प्रसारण लाइनको निर्माण आगामी चैतभित्र सम्पन्न गर्ने गरी काम भइरहेको आयोजनाका पदाधिकारीहरूले बताएका छन् । आयोजना प्रमुख नितिश पौडेलले जनाए अनुसार आयोजनाअन्तर्गत नै बाह्रबिसेमा २२० केभी सबस्टेसन निर्माण सम्पन्न भइसकेको छ।

लम्सीफेदी–चाँगुनारायण प्रसारण लाइन निर्माणमा अझै बाधा सल्टाउन बाँकी छ ।

लप्सीफेदी सबस्टेसनबाट काठमाडौं उपत्यकामा विद्युत् आपूर्तिका लागि लप्सीफेदी–चाँगुनारायण १३२ केभी प्रसारण लाइनको निर्माण अझ हुन बाँकी छ ।