Apr 03 2025 | २०८१, चैत २१गते
काठमाडौँ । होलीको विस्तारसँगै रंगको आयातमा वृद्धि भइरहेको पाइएको छ । चाडपर्वको सम्बन्ध अर्थतन्त्र र तिनका खेलाडीसँग हुन थालेपछि यसको असर बजारमा पर्नु स्वाभाविक हो । होली रङहरूको पर्व भएकाले विभिन्न थरी रङको प्रयोग होलीमा हुने गर्छ । सरकारी तथ्यांक केलाएर हेर्दा चालु आर्थिक वर्ष २०८१÷८२ को सात महिना अवधिमा भारत र चीनबाट १५ करोड ८९ लाख ६० हजार रुपैयाँ बराबरको रङ नेपालबाट भित्रिएको हो । यो भनेको १३ लाख ३९ हजार ५३ किलो बराबर हो ।
भन्सार विभागको पछिल्लो तथ्यांक हेर्दा गत सात महिनामा दक्षिणी छिमेकी भारतबाट सबैभन्दा धेरै रङ आयात भएको देखिन्छ । भारतबाट सोही अवधिमा १५ करोड ८८ लाख ३ हजार रुपैयाँ बराबरको १३ लाख ३८ हजार २ सय ९२ किलो रङ आयात भएको देखिन्छ । यसरी आयात भएको रङको अधिकांश परिमाण होलीमा खपत हुने गरेको छ । त्यसबाहेक दशैँ, तिहार अन्य चाडपर्वमा पनि खपत हुने गर्छ ।
नेपालमा भारतपछि उत्तरी छिमेकी चीनबाट धेरै रङ आयात हुने गरेको भन्सार विभागको तथ्यांकमा देखिन्छ । चीनबाट पछिल्लो सात महिनामा १ लाख ५७ हजार रुपैयाँ बराबरको ७ सय ६१ किलो रङ आयात भएको देखिएको छ ।यसका साथै अस्ट्रेलिया, युनाइटेड अरब इमिरेट्स (यूएई), फ्रान्स, मेक्सिको, जर्मनी लगायत देशबाट पनि नेपालमा रङ आयात हुने गरेको पाइन्छ ।
© 2025 All right reserved to Nayasadak.com | Site By : Sobij
