काठमाडौँ । नयाँसडक बुलेटिनमा यहाँहरूलाई स्वागत छ। आज चैत ३ आइतबार । यस्ता छन् दिनभरी घटेका मुख्यमुख्य आर्थिक समाचारहरू...

मन्त्रालय र योजना आयोगसँगको समन्वयमा बजेट आउँछ : उपप्रधानमन्त्री पौडेल

काठमाडौँ । उपप्रधानमन्त्री एवं अर्थमन्त्री विष्णुप्रसाद पौडेलले अर्थ मन्त्रालय, विषयगत मन्त्रालयहरु र राष्ट्रिय योजना आयोगसँग समन्वय गरी आगामी वर्षको बजेट आउने बताउनुभएको छ ।

आर्थिक वर्ष २०८२र८३ को बजेट निर्माणसम्बन्धी गृह मन्त्रालयसँगको छलफलमा अर्थमन्त्री पौडेलले तीन पक्षको समन्वयमा बजेट आउँदा बजेटप्रति अपनत्व हुने र कार्यान्वयनमा पनि सहज हुने बताउनुभयो । छलफल र परामर्श गरी बजेट आउँदा बुझाइमा एकरुपता हुने र देखापरेका चुनौती तथा समस्यालाई समाधान गरेर अघि बढ्न सकिने उहाँको भनाइ थियो । 

अर्थमन्त्री पौडेलले नीति तथा कार्यक्रम र बजेटबीच समन्वय हुनुपर्नेमा जोड दिनुभयो । उपलब्ध साधन स्रोतको ख्याल गरी बजेट तथा कार्यक्रमको प्रस्ताव पेश गर्न उहाँले आग्रह गर्नुभयो ।

राष्ट्र बैंकले १ अर्ब १५ करोड रुपैयाँ मुद्दति निक्षेपमा लगानी गर्ने

काठमाडौं । नेपाल राष्ट्र बैंकले आगामी चैत १० गतेदेखि लागू हुने गरी १ अर्ब १५ करोड रुपैयाँ बैंक र वित्तीय संस्थाहरुलाई निक्षेपको रुपमा लगानी गर्ने योजना सार्वजनिक गरेको छ। राष्ट्र बैंकले उपदान र पेन्सन कोषमा रहेको उक्त रकम वाणिज्य बैंकहरु, राष्ट्रियस्तरीय विकास बैंकहरु र वित्त कम्पनीहरुमा मुद्दति निक्षेपको रुपमा राख्नका लागि प्रस्ताव माग गरेको हो। यस योजनामा, ९२ करोड रुपैयाँ वाणिज्य बैंकहरुमा, १७ करोड २५ लाख रुपैयाँ राष्ट्रियस्तरीय विकास बैंकहरुमा, र ५ करोड ७५ लाख रुपैयाँ वित्त कम्पनीहरुमा निक्षेपका रुपमा जम्मा गरिने छ।

निक्षेपको अवधि ३६६ दिनको रहने छ र २०८२ चैत ९ गतेसम्म यो रकम जम्मा गरिने छ। बैंक र वित्तीय संस्थाले ३ मार्च ५ गते बेलुका ७ बजेभित्र प्रस्ताव पेश गर्नुपर्ने छ, जसमा प्रस्तावित रकम र ब्याज दरको विवरणसमेत सामेल हुनुपर्नेछ।

एलआइसी नेपालको हकप्रद सेयर नेप्सेमा सूचीकृत

काठमाडौं । नेप्सेमा लाइफ इन्सुरेन्स कर्पोरेसन (एलआइसी) नेपालको हकप्रद सेयर सूचीकृत भएको छ । आइतबार एलआइसी नेपालको २ करोड ३४ लाख ६८ हजार कित्ता हकप्रद सेयर सूचीकृत भएको हो । कम्पनीले गत मंसिरमा ८८.४५१६८ प्रतिशत हकप्रद सेयर बिक्री गरेको थियो । सोही हकप्रद सेयर अहिले सूचीकरण भएको हो ।

आर्थिक कार्यविधि तथा वित्तीय उत्तरदायित्व (पहिलो संशोधन) विधेयक स्वीकृत

काठमाडौँ ।  प्रतिनिधिसभाको आजको बैठकमा ‘आर्थिक कार्यविधि तथा वित्तीय उत्तरदायित्व (पहिलो संशोधन)विधेयक, २०८१ माथि विचार गरियोस्’ भन्ने प्रस्तावलाई बहुमतले स्वीकृत गरेको छ । 

उपप्रधानमन्त्री तथा अर्थमन्त्री विष्णुप्रसाद पौडेलले प्रस्तुत गर्नुभएको उक्त प्रस्तावलाई बैठकको बहुमतले स्वीकृत गरेको हो । विधेयकको सैद्धान्तिक छलफलमा सांसदले उठाउनुभएका प्रश्नको जवाफ दिँदै उपप्रधानमन्त्री पौडेलले आर्थिक कार्यविधि तथा वित्तीय उत्तरदायित्व (पहिलो संशोधन) विधेयक मुख्य रुपले बजेट कार्यान्वयनको प्रणालीलाई प्रभावकारी बनाउन र बजेट प्रणालीलाई अनुशासित बनाउने उद्देश्यले आएको बताउनुभयो । 

शेयर बजार : नेप्से परिसूचकमा २१.६३ अंकले घटेर २७१४.८५ बिन्दुमा, ६ अर्ब ८३ करोडभन्दा बढीको कारोबार

काठमाडौँ । आज नेप्से परिसूचकमा २१.६३ अंकले घटेर २७१४.८५ बिन्दुमा आएको छ । आज ६ अर्ब ८३ करोड रुपैयाँभन्दा बढीको सेयर कारोबार भएको छ । ट्रेडिङबाहेक बाँकी सबै समूहका सूचक घटेका छन् ।यस दिन ३ सय १६ कम्पनीको १ करोड ३९ लाखभन्दा बढी कित्ता सेयर कारोबार भएको छ । ५८ करोड ६६ लाख रुपैयाँभन्दा बढीसहित कारोबार रकममा हिमालयन रिइन्सुरेन्स अग्रस्थानमा रहेको छ । आज दोस्रो र तेस्रो स्थानमा क्रमशः महालक्ष्मी विकास बैंक र घलेम्दी हाइड्रोपावर परेका छन् ।

राजस्व सङ्कलन ठेक्कामा लगाउने कार्य तत्कालै बन्द गर्नुहोस्ः मन्त्री गुरुङ

काठमाडौँ ।सञ्चार तथा सूचना प्रविधिमन्त्री पृथ्वी सुब्बा गुरुङले स्थानीय तहलाई होर्डिङ बोर्डबाट हुने राजस्व सङ्कलन आफैले गर्न आग्रह गर्नुभएको छ । 

आज विज्ञापन बोर्डले यहाँ आयोजना गरेको विज्ञापन प्रवद्र्धनमा विज्ञापन एजेन्सीको भूमिकासम्बन्धी क्षमता विकास कार्यक्रममा उहाँले होर्डिङ बोर्डमार्फत व्यापक राजस्व चुहावट भएको उल्लेख गर्दै राजस्व सङ्कलन ठेक्कामा लगाउने कार्य तत्कालै बन्द गरी आफैँले राजस्व सङ्कलन गर्न स्थानीय तहलाई आग्रह गर्नुभएको हो ।

यसपटक मातृभूमि लघुवित्तले लाभांश वितरण नगर्ने

काठमाडौं । मातृभूमि लघुवित्त वित्तीय संस्थाले आर्थिक वर्ष २०८०–८१ को नाफाबाट यसपटक लाभांश वितरण नगर्ने निर्णय गरेको छ। कम्पनीको सञ्चालक समितिको शनिबार भएको बैठकमा यो निर्णय लिइएको हो। यसले कम्पनीका सेयरधनीलाई यस पटक कुनै पनि लाभांश प्राप्त नहुने बनाएको छ।

नेपाल राष्ट्र बैंकले बजारमा अधिक तरलता व्यवस्थापन गर्न ४० अर्ब रुपैयाँको निक्षेप संकलन उपकरण जारी गर्ने

काठमाडौं ।  नेपाल राष्ट्र बैंकले आइतबार (चैत ३ गते) ४० अर्ब रुपैयाँ तान्ने घोषणा गरेको छ। अधिक तरलता व्यवस्थापन गर्ने उद्देश्यले केन्द्रीय बैंकले निक्षेप संकलन उपकरणमार्फत यो रकम बजारबाट संकलन गर्न लागेको हो। आजदेखि शुरु हुने यो प्रक्रिया २१ दिनको अवधिका लागि हुनेछ।

इच्छुक बैंक र वित्तीय संस्थाले आइतबार दिउँसो ३ बजेसम्म बोलकबोलमार्फत आवेदन दिन सक्नेछन्। बजारमा रहेको अधिक तरलता नियन्त्रण गर्नका लागि राष्ट्र बैंकले नियमित रूपमा निक्षेप संकलन उपकरणको प्रयोग गर्दै आएको छ।

फरवार्ड माइक्रोफाइनान्सको ३ लाख ६३ हजार कित्ता संस्थापक सेयर लिलामी बिक्री खुला

काठमाडौं । फरवार्ड माइक्रोफाइनान्स लघुवित्त वित्तीय संस्थाले आज (चैत ३ गते)देखि ३ लाख ६३ हजार कित्ता संस्थापक सेयर लिलामी बिक्रीको प्रक्रिया सुरु गरेको छ । यस लिलामी सेयरमा कम्पनीका संस्थापक सेयरधनीसहित अन्य व्यक्ति, कम्पनी तथा संघसंस्थाले पनि आवेदन दिन सक्छन्।

लिलामीका लागि न्यूनतम मूल्य ५३१ रुपैयाँ राखिएको छ, र यसभन्दा बढी मूल्यमा पनि आवेदन दिन सकिनेछ। आवेदन गोप्य शिलबन्दी बोलपत्रको माध्यमबाट प्रस्तुत गर्नुपर्नेछ।

मन्त्रालय र योजना आयोगसँगको समन्वयमा बजेट आउँछ : उपप्रधानमन्त्री पौडेल

काठमाडौँ । उपप्रधानमन्त्री एवं अर्थमन्त्री विष्णुप्रसाद पौडेलले अर्थ मन्त्रालय, विषयगत मन्त्रालयहरु र राष्ट्रिय योजना आयोगसँग समन्वय गरी आगामी वर्षको बजेट आउने बताउनुभएको छ ।

आर्थिक वर्ष २०८२र८३ को बजेट निर्माणसम्बन्धी गृह मन्त्रालयसँगको छलफलमा अर्थमन्त्री पौडेलले तीन पक्षको समन्वयमा बजेट आउँदा बजेटप्रति अपनत्व हुने र कार्यान्वयनमा पनि सहज हुने बताउनुभयो । छलफल र परामर्श गरी बजेट आउँदा बुझाइमा एकरुपता हुने र देखापरेका चुनौती तथा समस्यालाई समाधान गरेर अघि बढ्न सकिने उहाँको भनाइ थियो ।

रात्रि क्लबमा आगलागी हुँदा ५१ जनाको मृत्यु

स्कोप्जे । उत्तरी म्यासेडोनियाको एक रात्रि क्लबमा आइतबार बिहान आगलागी हुँदा ५१ जनाको मृत्यु भएको त्यहाँको गृहमन्त्रालयले जनाएको छ । 

म्यासेडोनियाका पूर्वी शहर कोकानीस्थित ‘क्लब पल्स’मा भएको आगलागीमा परी कम्तीमा ५१ जनाको मृत्यु भएको र १०० भन्दा बढी घाइते भएको गृहमन्त्री पान्स टोस्कोभस्कीले बताउनुभएको हो । 

डीएनके नामक एक लोकप्रिय हिप–हप जोडी हेर्नको लागि करिब एक हजार भन्दा बढी युवा प्रशंसकहरू भेला भएको र उक्त स्थानमा एक्कासी आगलागी भएपछि उनीहरूको हताहत भएको हो ।

मध्यभोटेकोशी र खिम्ती–बाह्रबिसे प्रसारण लाइन छिटो गराउन प्राधिकरण टोलीको सक्रियता

काठमाडौँ । नेपाल विद्युत् प्राधिकरणको टोलीले  सिन्धुपाल्चोकमा निर्माणाधीन मध्यभोटेकोशी जलविद्युत आयोजना र खिम्ती–बाह्रबिसे प्रसारण लाइन निर्माण एक महिनाभित्र पूरा गराउन सक्रियता बढाएको छ । प्राधिकरणकै सहायक कम्पनी चिलिमे जलविद्युत लिमिटेडको अगुवाइमा निर्माण भइरहेको यो आयोजनालाई समयमै पूरा गराउन टोलीको सक्रियता बढेको हो।

मध्यभोटेकोशीबाट विद्युत् उत्पादनका सुरु गर्न संरचना तथा उपकरणहरु परीक्षणका क्रममा पानी हाल्दा सुरुङ चुहिएकोले  हाल सुरुङको मर्मत र सुधारको काम भइरहेको छ। १०२ मेगावाट जडित क्षमताको मध्यभोटेकोशीबाट हिउँदयामका महिनामा ४० मेगावाटसम्म विद्युत् उत्पादन हुन्छ।

ठूला जलविद्युत् आयोजनाको वित्तीय व्यवस्थापनको समय दुई वर्ष थप

काठमाडौँ । सरकारले ठूला जलविद्युत् आयोजनाको वित्तीय व्यवस्थापनका लागि दुई वर्ष समय थप गर्ने भएको छ । विद्युत् विकास विभागले विद्युत् आयोजनाको अनुमतिपत्रसम्बन्धी निर्देशिका, २०७५ लाई संशोधन गरी ठूला जलविद्युत् आयोजनाको वित्तीय व्यवस्थापनका लागि दुई वर्ष समय थप गरेको हो ।

      विभागले विद्युत् खरिद बिक्री सम्झौताका लागि लामो समय लाग्ने हालको अवस्था र ठूला प्रकृतिका आयोजनालाई वित्तीय व्यवस्थापन गर्न लाग्ने समयलाई ध्यानमा राख्दै १०० मेगावाटभन्दा बढी जडित क्षमता भएका आयोजनालाई दुई वर्ष समय थप गर्ने व्यवस्था गरेको विभागका महानिर्देशक नवीनराज सिंहले जानकारी दिनुभयो ।