Apr 03 2025 | २०८१, चैत २१गते
काठमाडौँ । भारतका लागि नेपाली राजदूत शंकर शर्माले भारती प्रान्त उत्तरप्रदेशका मुख्यमन्त्री योगी आदित्यनाथसँग भेटवार्ता गरेका छन् ।परराष्ट्र मन्त्रालय स्रोतले जनाए अनुसार उनले सोमबार अपराह्न आदित्यनाथसँग भेटवार्ता गरेका हुन् । भेटका क्रममा नेपाल भारत सम्बन्धको बहुआयामिक पक्षमा कुराकानी भएको राजदूत शर्माले जनाएका छन् ।
राजदूत शर्माले सामाजिक सञ्जाल एक्समा लेखेका छन्, ‘गोरखपुरमा प्रेरणादायी गोर्खा म्यूजियम सुरु गरेकामा म उहाँलाई (मुख्यमन्त्री योगी) धन्यवाद पनि दिन चाहन्छु ।’
नयाँ दिल्लीस्थित नेपाली दूतावासले शर्माको आदित्यनाथसँगको भेटबारे थप बताएको छैन । तर, मन्त्रालय स्रोतका अनुसार, भेटका क्रममा नेपालमा राजावादी समूहको हिंसात्मक प्रदर्शनको विषयबारे पनि कुराकानी भएको अपेक्षा गरिएको छ ।
मन्त्रालय स्रोतका अनुसार भारतीय सञ्चारमाध्यमहरुमा समेत आदित्यनाथसँग जोड्दै पूर्वराजाबारे शृृखंलाबद्ध समाचारहरु प्रकाशित भइरहेका बेला त्यसविषयमा कुराकानी हुनु स्वभाविक हो । यसका विभिन्न पाटोबारे छलफल भएको छ ।
परराष्ट्रमन्त्री आरजु राणाको पछिल्लो भारत भ्रमणका बेला समेत भारतीय विदेशमन्त्री एस जयशंकरसँग नेपालमा भएको राजावादी प्रदर्शनबारे कुराकानी भएको सार्वजनिक भएको थियो । त्यसबेला भारतीय विदेशमन्त्रीले आफूहरुको त्यसमा कुनै किमिसको सम्बन्ध नभएको बताएको उनले एक सञ्चारमाध्यमलाई प्रतिक्रिया दिएकी थिइन् ।
यसपछि पनि परराष्ट्रमन्त्रालयमा भारतीय राजदूत नवीन श्रीवास्तवसँग उनले कुराकानी गरेकी थिइन् । यसअघि राजावादी समूहले गरेको प्रदर्शनका क्रममा प्रदीप विक्रम राणा नामक व्यक्तिले जुलुसमा योगी आदित्यनाथको तस्वीर समेत बोकेका थिए । प्रहरीले यस विषयमा सोधपुछ गर्न राणाको खोजी समेत गर्दै आएको छ । तर उनी फरार भएर भारत पुगिसकेको खुलेको थियो । राजदूत शर्मा र मुख्यमन्त्री योगीबीचको भेटवार्तालाई कूटनीतिक वृतमा गम्भीरताका साथ लिइएको छ ।
© 2025 All right reserved to Nayasadak.com | Site By : Sobij
