काठमाडौँ । नयाँसडक बुलेटिनमा यहाँहरूलाई स्वागत छ। आज १९ आइतबार । यस्ता छन् दिनभरी घटेका मुख्यमुख्य आर्थिक समाचारहरू...

नेपाल स्टक एक्सचेन्जमा मंगलबार ४ कम्पनीको हकप्रद र बोनस सेयर सूचीकृत

काठमाडौं । नेपाल स्टक एक्सचेन्ज (नेप्से) मा मंगलबार चार कम्पनीको हकप्रद र बोनस सेयर सूचीकृत भएका छन्। तीमध्ये नेपाल एसबीआई बैंक र फरवार्ड माइक्रोफाइनान्सको बोनस सेयर, जबकि ङादी ग्रुप पावर र बलेफी हाइड्रोपावरको हकप्रद सेयर सूचीकृत भएका छन्।

नेपाल एसबीआई बैंकले ३.८० प्रतिशत बोनस सेयरको ३३ लाख ९० हजार ५७.८७ कित्ता सूचीकृत गरेको छ। यसका साथै, फरवार्ड माइक्रोफाइनान्सले पनि गत वर्षको नाफाबाट वितरण गरेको १३.३० प्रतिशत बोनस सेयरका रूपमा १४ लाख ३ हजार ८९९.७६ कित्ता सेयर सूचीकृत गरेको छ।

अर्कोतर्फ, ङादी ग्रुप पावरको १:१ अनुपातमा (१०० प्रतिशत) बिक्री गरिएको हकप्रद सेयरको १ करोड ८५ लाख १२ हजार ७९२.२२५ कित्ता नेप्सेमा सूचीकृत भएको छ। बलेफी हाइड्रोपावरको पनि १ करोड ८२ लाख ७९ हजार ७०० कित्ता हकप्रद सेयर सूचीकृत गरिएको छ, जसले हालै बिक्री गरेको शतप्रतिशत हकप्रद सेयर सूचीकरण गरेको हो।

नेप्सेका नवनियुक्त सिइओले बुधबारदेखि जिम्मेवारी सम्हाल्ने

काठमाडौँ। सरकारले नेपाल स्टक एक्सचेन्ज (नेप्से) को प्रमुख कार्यकारी अधिकृत (सिइओ) मा झापाका चुडामणि चापागाईंलाई नियुक्त गरेको छ । सोमबारको मन्त्रिपरिषद् बैठकले उहाँलाई उक्त पदमा नियुक्त गरेको हो ।

राजस्व सचिव दिनेशकुमार घिमिरेले आज उहाँलाई नियुक्तिपत्र हस्तान्तरण गर्नुभएको हो । नवनियुक्त सिइओ चापागाईंले बुधबार कार्यभार सम्हाल्ने कार्यक्रम रहेको नेप्सेले जनाएको छ

यस्ता छन् दुई मन्त्रिपरिषद् बैठकका निर्णय ( सूचीसहित )

काठमाडौं । सरकारले सोमबार (चैत १८ गते) बसेको मन्त्रिपरिषद् बैठकले गरेका निर्णय सार्वजनिक गरेको छ । बैठकले नेपाल स्टक एकस्चेन्ज लिमिटेडको प्रमुख कार्यकारी अधिकृत (सीइओ) पदमा चुडामणी चापागाईलाई नियुक्त गर्ने निर्णय गरेको छ ।

‘कार्यान्वयनयोग्य बजेट ल्याउनेतर्फ सरकारको ध्यान केन्द्रित छ’

काठमाडौँ ।उपप्रधानमन्त्री एवं अर्थमन्त्री विष्णुप्रसाद पौडेलले कार्यान्वयनयोग्य र यथार्थपरक बजेट ल्याउनेतर्फ सरकारको ध्यान केन्द्रित रहेको बताउनुभएको छ ।

आगामी आर्थिक वर्षको बजेट निर्माणबारे श्रम, रोजगार तथा सामाजिक मन्त्रालयसँगको छलफलका क्रममा उहाँले वितरणमुखी नभई यथार्थपरक र कार्यान्वयनयोग्य योजना तथा कार्यक्रम तर्जुमा गर्न सुझाउनुभयो । उहाँले श्रम, सीप, रोजगारी र उत्पादनलाई प्राथमिकता दिनुपर्ने उल्लेख गर्दै वितरणमुखी बजेटले उचित प्रतिफल नदिने बताउनुभयो । 

अर्थमन्त्रीले सामाजिक सुरक्षासँग जोडिएका कार्यक्रमलाई गम्भीर रुपमा समीक्षा गर्न जरुरी भएको उल्लेख गर्दै विभिन्न मन्त्रालय र निकायका कार्यक्रमलाई एकीकृत गर्नुपर्नेमा  जोड दिनुभयो ।

इदको अवसरमा यूएई सरकारले दियो १६६ नेपालीलाई आममाफी

काठमाडौँ ।सरकारले पवित्र महिना रमादान एवं ईद पर्वका अवसरमा एक सय ६६ जना नेपाली बन्दीलाई आम माफी दिइएकामा संयुक्त अरब इमिरेट्स (युएई) सरकारप्रति हार्दिक कृतज्ञता ज्ञापन गरेको छ ।

परराष्ट्र मन्त्रालयले आज एक विज्ञप्ति जारी गर्दै युएई सरकारको उक्त कदम हार्दिकतापूर्ण द्विपक्षीय सम्बन्धको नमूना भएको जनाएको छ ।

अबुधाबीस्थित नेपाली दूतावासको अनुरोधमा युएई सरकारले उनीहरुलाई आममाफी दिएको हो ।

गार्डियन माइक्रो लाइफको विशेष साधारण सभा वैशाख ५ गते , १०० प्रतिशत हकप्रद सेयर जारी गर्ने

काठमाडौं । गार्डियन माइक्रो लाइफ इन्सुरेन्सले हकप्रद सेयर जारी गर्ने भएको छ । कम्पनीको सोमबार (चैत १८ गते) बसेको सञ्चालक समितिले १०० प्रतिशत (१ः१ अनुपातमा) हकप्रद सेयर जारी गर्ने निर्णय गरेको हो । यसले हकप्रद सेयर प्रस्ताव पारित गर्न वैशाख ५ गते विशेष साधारण सभा पनि बोलाएको छ । कम्पनीले सभा प्रयोजनका लागि चैत २८ गते बुक क्लोज हुने जानकारी गराएको छ ।

विद्युत् प्राधिकरणका दुवै रिट ‘हेर्दाहेर्दै’ मा

काठमाडौँ ।सर्वोच्च अदालतमा नेपाल विद्युत् प्राधिकरणको कार्यकारी निर्देशकबाट हटाइएका कुलमान घिसिङ र नवनियुक्त हितेन्द्रदेव शाक्यको रिट निवेदन रिट हेर्दाहेर्दैमा बुधबारका लागि सुनुवाइ हुनेभएको छ ।
 
 न्यायाधीशद्वय कुमार चुडाल र नित्यानन्द पाण्डेयको संयुक्त इजलासले आज दुवैका रिटमाथि सुनुवाइ हुँदाहुँदै समय नभ्याएपछि हेर्दाहेर्दैमा बुधबारका लागि सुनुवाइ हुने भएको हो ।
 
 प्राधिकरणको कार्यकारी निर्देशक पदबाट आफूलाई हटाउने सरकारको निर्णय बदरको माग गर्दै कुलमान घिसिङले रिट निवेदन दायर गर्नुभएको थियो ।
 
     प्राधिकरणका कार्यकारी निर्देशक हितेन्द्रदेव शाक्यले चार वर्षअघि आफूलाई निकालेर घिसिङको नियुक्ति नै गलत भएको उल्लेख गर्दै त्यतिबेला रिट निवेदन दायर गर्नुभएको थियो ।

कीर्तिपुरस्थित क्रिकेट मैदानको निरीक्षण अब सहरी विकास मन्त्रालयबाट

काठमाडौँ । प्रधानमन्त्रीको समेत जिम्मेवारी सम्हाल्नुभएका उपप्रधान तथा शहरी विकासमन्त्री प्रकाशमान सिंहले कीर्तिपुरमा निर्माणाधीन ‘क्रिकेट स्टेडियम’ को सिंहदरबारस्थित आफ्नै कार्यकक्षबाट निरीक्षण गर्नुभएको छ । 

सहरी विकास मन्त्रालयको सिंहदरबारस्थित कार्यकक्षबाटै उहाँले आगामी दिनमा दैनिक नियमित निरीक्षण हुनेछ । समयमै काम सक्न आठ घण्टाका दरले अहिले तिन सिफ्टमा काम पनि भइरहेको छ ।

उपप्रधानमन्त्री सिंहले निर्धारित समयमै सक्नेगरी काम गर्ने व्यवस्था मिलाउन र कामको गति बढाउनुसपर्नेमा जोड दिनुभएको छ । सहरी विकास मन्त्रालयअन्तर्गतको सङ्घीय सचिवालय निर्माण तथा व्यवस्थापन कार्यालयबाट कीर्तिपुर क्रिकेट मैदानमा अन्तरराष्ट्रिय मापदण्डअनुरूप प्याराफिट निर्माण र फ्लडलाइट जडान गत फागुनमा सम्झौता भई आगामी वैशाख २४ गतेभित्र सम्पन्न गर्नेगरी काम भइरहेको छ ।

नेपाल कफी फेस्टिभल एण्ड च्याम्पियनसिप२०८१को आयोजना

काठमाडौँ । नेपाल कफी फेस्टिभल एण्ड च्याम्पियनसिप२०८१को आयोजना हुने भएको छ । चैत २१गतेदेखि २३गतेसम्म ललितपुरको सानेपास्थित हेरिटेज गार्डेनमा हुने भएको हो ।नेपाल कफी व्यवसायी महासंघले अवसरको खोजी गर्न , ज्ञान बाँड्न र नेपालमा कफी क्षेत्रको विकास प्रवद्र्धन गर्न नेपाल कफी फेस्टिभल एण्ड च्याम्पियनसिप २०८१को आयोजना गरिएको जनाएको हो । 

कफीको आन्तरिक एवं बाह्य बजार प्रवद्र्धन गर्न, कफी क्षेत्र विकास प्रवद्र्धन गर्न, उद्यमी व्यवसायीको आफ्ना उत्पादनहरू, सेवाहरूको प्रदर्शनी, कफीको राष्ट्रिय विद्यागत प्रतिस्पर्धा र पुरस्कार(क्याफे बारिस्ता, लाते आट र ब्रुइङ्ग)लगायत कफीको मूल्य शृङ्खला अनुरुप विविध विषयका वर्तमान अवस्था र वस्तुस्थितिलाई सम्बोधन हुने गरी लगानी मैत्री वातावरण तय गर्दै सरकार सम्बद्ध सम्पूर्ण मन्त्रालयहरू,राष्ट्रिय चिया तथा कफी विकास बोर्ड र व्यापार तथा निकासी प्रवद्र्धन केन्द्रसँग सहकार्य एवं समन्वय गरी यस कार्यक्रमको आयोजना गर्न लागिएको महासंघले जनाएको छ ।

इयुसँग ‘आवश्यक भएमा’ अमेरिकी करको बदला लिने ‘कडा योजना’ छ : भन डेर लेयन

स्ट्रासबर्ग ।युरोपेली सङ्घ (इयु) प्रमुख उर्सुला भन डेर लेयनले मङ्गलबार यो हप्ता लागू हुने अमेरिकी करहरूको ‘वार्ता समाधान’ का लागि ब्लकले अझै आशा गरेको तर आवश्यक परेमा जवाफी कारबाही गर्न ‘सबै उपकरण टेबलमा रहेको’ बताउनुभएको छ ।

“हामी वार्ताका लागि खुला छौँ”, युरोपेली आयोगका प्रमुखले युरोपेली संसद्को सत्रमा भन्नुभयो, “तर आवश्यक परेमा बदला लिने हाम्रो बलियो योजना छ ।”

अमेरिकी राष्ट्रपति डोनाल्ड ट्रम्पले धेरै देशविरुद्ध मङ्गलबार राति जतिसक्दो चाँडो करहरूको नयाँ समूह घोषणा गर्ने तयारी गर्नुभएको छ । यसलाई उहाँले कथित अनुचित व्यापार असन्तुलनलाई सुधार गर्न ‘मुक्ति दिवस’ भन्नुभएको छ ।

शेयर बजार : नेप्से परिसूचकमा १५.५७ अंकले घटेर २६७७.५५ बिन्दुमा, ५ अर्ब ७९ करोडभन्दा बढीको कारोबार

काठमाडौँ । आज नेप्से परिसूचकमा १५.५७ अंकले घटेर २६७७.५५ बिन्दुमा आएको छ । आज ५ अर्ब ७९ करोड रुपैयाँभन्दा बढीको सेयर कारोबार भएको छ । एउटा कम्पनी सकारात्मक सर्किट लेबलमा कारोबार भएको छ  । ट्रेड्रिङबाहेक बाँकी सबै समूहका सूचक घटेका छन् ।यस दिन ३ सय २० कम्पनीको १ करोड ६ लाखभन्दा बढी कित्ता सेयर कारोबार भएको छ ।आज  ६४ करोड २५ लाख रुपैयाँभन्दा बढीसहित कारोबार रकममा हिमालयन रिइन्सुरेन्स अग्रस्थानमा रहेको छ ।आज दोस्रो र तेस्रो स्थानमा क्रमशः नेपाल पुनर्बिमा कम्पनी र सीइडीबी होल्डिङ्स परेका छन् ।

नागरिक लगानी कोषले सानिगाड र कालंगा हाइड्रो लिमिटेडसँग सेयर प्रत्याभूति सम्झौतामा हस्ताक्षर

काठमाडौं । नागरिक लगानी कोषले सानिगाड हाइड्रो र कालंगा हाइड्रो लिमिटेडसँग सेयर प्रत्याभूति गर्ने सम्झौतामा हस्ताक्षर गरेको छ। कोषले सानिगाड हाइड्रो लिमिटेडको ८५ करोड ५० लाख रुपैयाँ बराबरको सेयर प्रत्याभूति गर्ने निर्णय गरेको हो, जसको १०० रुपैयाँ अंकित मूल्यका ८५ लाख ५० हजार कित्ताको सेयर हुनेछन्।

यस सम्झौतामा कोषको तर्फबाट कार्यकारी निर्देशक पर्वतकुमार कार्की र सानिगाड हाइड्रोका प्रबन्ध निर्देशक राजेशकुमार श्रेष्ठले हस्ताक्षर गरेका छन्।

त्यसैगरी, कोषले कालंगा हाइड्रो लिमिटेडसँग पनि सेयर प्रत्याभूति सम्झौता गरेको छ। कालंगाको १०० रुपैयाँ अंकित मूल्यका ४९ लाख कित्ता सेयरको प्रत्याभूति सम्झौतामा कोषका कार्यकारी निर्देशक पर्वतकुमार कार्की र कालंगाका अध्यक्ष खगेश्वर बोहोराले हस्ताक्षर गरेका छन्।

प्रधानमन्त्री ओली थाइल्याण्ड प्रस्थान

काठमाडौं ।प्रधानमन्त्री केपी शर्मा ओली थाइल्याण्ड भ्रमणका लागि प्रस्थान गरेका छन्। मंगलबार दिउँसो प्रधानमन्त्री ओली थाइल्याण्ड प्रस्थान गरेका हुन्।

बिमस्टेक शिखर सम्मेलनमा सहभागी हुनका लागि प्रधानमन्त्री थाइल्याण्ड गएका हुन् । नेपालको कार्यकारी प्रमुखको थाइल्याण्डको औपचारिक भ्रमण ६५ वर्ष पछि हुन लागेको हो । थाइल्याण्ड भ्रमणका क्रममा दुईवटा समझदारी पत्रमा हस्ताक्षर हुने तय भएको छ ।

प्रधानमन्त्री चैत २३ गते स्वदेश फर्किने कार्यक्रम रहेको छ ।

असामान्य रूपमा तातो ग्रीष्म ऋतु आउने भारतीय मौसम पूर्वानुमानकर्ताहरूको चेतावनी

नयाँदिल्ली ।भारतमा यस गर्मीमा सामान्यभन्दा बढी तापक्रम हुने अपेक्षा गर्न सकिने र गर्मीका अधिक दिनहरूले जीवन र जीविकोपार्जनमा प्रभाव पार्ने मौसम कार्यालयले चेतावनी दिएको छ ।

देश तातो गर्मीका लागि अपरिचित छैन तर वर्षौंको वैज्ञानिक अनुसन्धानले जलवायु परिवर्तनले तातो छालहरू लामो, अधिक बारम्बार र अधिक तीव्र हुँदै गइरहेको पत्ता लगाएको छ ।

भारतमा ग्रीष्म ऋतु अप्रिलदेखि जुनसम्म रहन्छ । यो अवधिमा मौसमको उच्च तापक्रम प्रायः ४५ डिग्री सेल्सियस ९११३ डिग्री फरेनहाइट० नाघेको हुन्छ ।

नागरिक लगानी कोष र पूर्वाञ्चल विश्वविद्यालयबीच योगदानमा आधारित उपदान र पेन्सन कोष सञ्चालन सम्झौता

काठमाडौं । नागरिक लगानी कोष र पूर्वाञ्चल विश्वविद्यालय गोठगाउँ मोरङबीच योगदानमा आधारित उपदान तथा पेन्सन कोष सञ्चालन गर्ने सम्बन्धी सम्झौता भएको छ । सम्झौतामा पूर्वाञ्चल विश्वविद्यालयका उपकुलपति प्रा.डा.बिजुकुमार थपलिया र कोषको तर्फबाट पर्वतकुमार कार्कीले हस्ताक्षर गर्नु भएको हो । 

सो अवसरमा उपकुलपति थपलियाले शिक्षक तथा कर्मचारीको उपदान सञ्चालन एवं व्यवस्थापन कोषलाई दिन पाएकोमा खुसी व्यक्त गर्नुभयो भने कोषका कार्यकारी निर्देशक कार्कीले उपदानको उचित व्यवस्थापन एवं सञ्चालन गर्ने र सहभागीलाई उचित प्रतिफल दिने प्रतिबद्धता व्यक्त गर्नुभएको थियो ।

वीरगञ्ज सुक्खा बन्दरगाहको व्यवस्थापन र सञ्चालन भारतीय कम्पनीलाई जिम्मा

वीरगञ्ज ।  वीरगञ्ज सुक्खा बन्दरगाह (इन्ल्यान्ड क्लियरेन्स डिपो)को व्यवस्थापन र सञ्चालनको जिम्मेवारी भारतीय कम्पनी प्रिस्टिन मेगा लजिष्टिक पार्क प्रालिले पाएको छ । 

नेपाल इन्टरमोडल यातायात विकास समितिका कार्यकारी निर्देशक आशिष गजुरेलले आगामी पाँच वर्षका लागि सुक्खाबन्दरगाह सञ्चालन र व्यवस्थापनका लागि प्रिस्टिन मेगा लजिष्टिक पार्क प्रालि रु चार अर्ब ७१ करोड लागतमा छनोट भएको जानकारी दिनुभयो । 

समितिका अनुसार सुक्खाबन्दरगाहको व्यवस्थापन र सञ्चालनका लागि आह्वान गरेको बोलपत्रको प्राविधिक मूल्याङ्कनमा कन्टेनर कर्पोरेसन अफ इन्डिया लिमिटेड र प्रिस्टिन मेगा लजिष्टिक पार्क प्रालि छनोट भएका थिए ।

आज मंगलबार सुनको मूल्य प्रतितोला एक लाख ७९ हजार ७०० कायम

काठमाडौँ।अन्तरराष्ट्रिय बजारमा सुनको मूल्य बढेसँगै त्यसको प्रभाव स्थानीय बजारमा पनि परेको छ । बितेका चारदिनदेखि पहेँलो धातुको मोल बढिरहेको छ । सोमबार प्रतितोला रु एक लाख ७७ हजार ९०० मा कारोबार भएको सुन आज तोलामा रु एक हजार ८०० ले बढेर रू एक लाख ७९ हजार ७०० कायम भएको नेपाल सुनचाँदी व्यवसायी महासङ्घले जनाएको छ । चाँदीको मूल्य भने स्थिर छ ।

पहिरो प्रभावित क्षेत्रमा वैकल्पिक सडक निर्माण गरिँदै

धुलिखेल (काभ्रेपलाञ्चोक)। गत असोजको दोस्रो साताको बाढीपहिरोका कारण क्षतिग्रस्त बिपी राजमार्गमा अहिले तत्कालका लागि खोलाको बगरैबगर बनाएको वैकल्पिक बाटोमा सवारीसाधन सञ्चालन भइरहेको छ । काभ्रेपलाञ्चोकको नमोबुद्ध नगरपालिका–५ चौकीडाँडाबाट सिन्धुलीको सिमाना बर्खेखोलासम्म अहिले त्यसरी वैकल्पिक सडक बनाएर खोलाको बगरैबगर सवारी सञ्चालन हुँदै आएको छ । काठमाडौँबाट पूर्वीतराई जाने छोटो दूरीको यात्रा बिपी राजमार्ग सबैको छनोटको गन्तव्य हो । तर बर्खायाम नजिकिएसँगै ती सडकमा सवारी सञ्चालन गर्न सकिने अवस्था नभएका कारण सडक डिभिजन भक्तपुर त्यसको विकल्पमा आउँदो बर्खायामलाई मध्यनजर गर्दै खोलाको सहतभन्दा माथि उठाएर वैकल्पिक सडक निर्माण गर्ने क्रममा छ । जसअन्तर्गत चौकीडाँडास्थित धेरै क्षतिग्रस्त बनेको खण्डमा खोलाको सतहदेखि माथि उठाएर वैकल्पिक बाटो निर्माणको काम भइरहेको छ ।

राजदूत पौडेलद्वारा ओहदाको प्रमाणपत्र पेस

लिस्बन (पोर्चुगल)।पोर्चुगलका लागि नवनियुक्त नेपाली राजदूत प्रकाशमणि पौडेलले राष्ट्रपति मार्सेलो रेबेलो डी सौसासमक्ष ओहोदाको प्रमाणपत्र पेस गर्नुभएको छ । लिस्बनस्थित राष्ट्रपति भवन बेलेम प्यालेसमा सोमबार आयोजित एक समारोहबीच राजदूत पौडेलले राष्ट्रपति सौसासमक्ष आफ्नो ओहोदाको प्रमाणपत्र पेस गर्नुभएको हो । ओहोदाको प्रमाणपत्र बुझाएपछि राजदूत पौडेलले राष्ट्रपतिसँग शिष्टाचार भेटवार्ता गर्नुभएको थियो । सो अवसरमा उहाँहरुबीच नेपाल र पोर्चुगलबीचको द्विपक्षीय सम्बन्धलाई थप सुमधुर बनाउने तथा आपसी हित एवं सहयोग अभिवृद्धिबारे छलफल भएको लिस्बनस्थित नेपाली दूतावासले जनाएको छ । सो अवसरमा राजदूत पौडेललाई बधाई ज्ञापन गर्दै राष्ट्रपति सौसाले सफल कार्यकालको शुभकामना दिनुभएको थियो ।

यस्तो छ आजका लागि निर्धारित विदेशी मुद्राको विनिमय दर

काठमाडौँ । नेपाल राष्ट्र बैंकले आजका लागि विदेशी मुद्राको विनिमय दर निर्धारण गरेको छ । राष्ट्र बैंकका अनुसार अमेरिकी डलर एकको खरिदर १३६ रुपैयाँ ४६ पैसा र बिक्रीदर १३७ रुपैयाँ ०६ पैसा कायम भएको छ । 

युरोपियन युरो एकको खरिदर १४७ रुपैयाँ ६३ पैसा र बिक्रीदर १४८ रुपैयाँ २८ पैसा, युके पाउन्ड स्ट्रलिङ एकको खरिदर १७६ रुपैयाँ ६३ पैसा र बिक्रीदर १७७ रुपैयाँ ४० पैसा, स्विस फ्र्याङ्क एकको खरिददर १५४ रुपैयाँ ९२  पैसा र बिक्रीदर १५५ रुपैयाँ ६० पैसा कायम गरिएको छ ।