Apr 30 2025 | २०८२, वैशाख १८गते
काठमाडौं। बैंकिङ प्रणालीमा देखिएको अधिक तरलता घटाउन नेपाल राष्ट्र बैंकले आज २१ दिनको अवधिका लागि ५० अर्ब रुपैयाँ बराबरको निक्षेप संकलन उपकरण (Deposit Collection Instrument) जारी गरेको छ।
यसअघि चैत २५ र २७ गते जारी गरिएको ५५ अर्ब रुपैयाँको निक्षेप संकलन आज परिपक्व भएसँगै राष्ट्र बैंकले पुनः वित्तीय प्रणालीबाट ५० अर्ब रुपैयाँ तान्ने निर्णय गरेको हो। इच्छुक बैंक तथा वित्तीय संस्थाहरूले आज दिउँसो ३ बजेसम्म बोलकबोल प्रक्रियामार्फत आवेदन दिन सक्नेछन्।
यस निक्षेपको परिपक्वता मिति २०८२ साल जेठ ७ गते तय गरिएको छ। ब्याजदर भने प्रतिस्पर्धात्मक बोलकबोल प्रणालीबाट निर्धारण हुनेछ। आवेदक संस्थाहरूले न्यूनतम १० करोड र अधिकतम ५ अर्बसम्म माग गर्न सक्ने व्यवस्था गरिएको छ।
बैंकिङ प्रणालीमा लामो समयदेखि तरलता अधिक रहेको र त्यसअनुसार कर्जा प्रवाह नहुँदा राष्ट्र बैंकले स्थायी निक्षेप सुविधा (SDF) र अन्य उपकरणमार्फत बारम्बार तरलता व्यवस्थापन गर्दै आएको छ। यस्तै, केन्द्रीय बैंकले ब्याजदर करिडोरको तल्लो सीमा ३ प्रतिशत तोकेको छ, जुन दरभन्दा तल अन्तरबैंक दर जान नदिन राष्ट्र बैंक सक्रिय रहँदै आएको छ।
निक्षेप संकलन उपकरणको ब्याजदर बजारको तरलताको अवस्थाअनुसार परिवर्तन हुन्छ—तरलता बढी हुँदा ब्याजदर घट्ने, र कडाइको अवस्थामा बढ्ने गर्छ। जबकि स्थायी निक्षेप सुविधाको ब्याजदर भने स्थिर ३ प्रतिशतमा कायम छ।
© 2025 All right reserved to Nayasadak.com | Site By : Sobij
