काठमाडौं । नेपाल स्टक एक्सचेन्ज (नेप्से)मा तेह्रथुम पावर कम्पनी लिमिटेडको १०० प्रतिशत हकप्रद सेयर जारीसँगै सेयर मूल्यमा समायोजन गरिएको छ। आइतबारको अन्तिम कारोबार मूल्य रु. ५९४.११ लाई आधार मानेर मूल्य समायोजन गरिँदा, समायोजित मूल्य रु. ३४७.०६ कायम भएको छ। अब सोमबारदेखि तेही समायोजित मूल्यलाई आधार बनाएर सेयर कारोबार सुरु हुनेछ।

सभामुख घिमिरेद्वारा श्रीमद्भागवत सप्ताह ज्ञान महायज्ञ उद्घाटन

भक्तपुर । सभामुख देवराज घिमिरेले समाज, राष्ट्र, आफैँ र आफ्नै घरपरिवारप्रति जिम्मेवार बोध गर्ने असल नागरिक निर्माणको आवश्यकता औँल्याउनुभएको छ । आज भक्तपुरको गठ्ठाघरमा सनातन पितृमुक्ति समाजले आयोजना गरेको श्रीमद्भागवत सप्ताह ज्ञान महायज्ञको उद्घाटन गर्दै उहाँले यस्तो बताउनुभयो ।

मधेशप्रदेशका पूर्वमन्त्री विजयकुमारसहित ८ जना विरुद्ध विशेष अदालतमा भ्रष्टाचार मुद्दा दायर

काठमाडौँ । मधेश प्रदेशका एक जना पूर्वमन्त्रीसहित ८ जना विरुद्ध भ्रष्टाचार मुद्दा दायर भएको छ।सर्लाहीको बागमती नगरपालिकामा भएको भ्रष्टाचारमा मन्त्री ,मेयर तथा उपमेयरगरी ८ जना विरुद्ध मुद्दा दायर गरिएको हो ।
अख्तियार दुरुपयोग अनुसन्धान आयोगले आइतबार मधेस प्रदेशको आर्थिक मामिला तथा योजना मन्त्रालयका तत्कालीन मन्त्री विजय कुमार, बागमती नगरपालिकाका तत्कालीन प्रमुख भरतकुमार थापा, उपप्रमुख लीलाकुमारी मोक्तानलगायत विरुद्ध विशेष अदालतमा मुद्दा दायर गरेको हो।

आयोगका अनुसार त्यस्तै मुद्दामा उनीहरुसँगै निलम्बित प्रमुख प्रशासकीय अधिकृत विमलकुमार पोखरेल, मधेस प्रदेशको आर्थिक मामिला तथा योजना मन्त्रालयका कानुन अधिकृत गोकुल भुजेल, इन्जिनियर निरन्जन लामिछाने, नगरपालिकाका इन्जिनियर सागर पौडेल र लेखा अधिकृत विश्वराज पोखरेललाई विपक्षी बनाइएको जनाइएको छ।

हैदराबादको भवनमा सर्ट सर्किटका कारण आगलागी, १७ जनाको मृत्यु

हैदराबाद ।हैदराबादको गुलजार हाउसमा रहेको भवनमा भएको आगलागीको प्रारम्भिक जाँचबाट कम्तीमा १७ जनाको ज्यान गएको घटनामा शर्ट सर्किटका कारण ठूलो आगलागी भएको देखिएको अग्नि विभागका एक अधिकारीले आइतबार बताएका छन् ।

“प्रारम्भिक जाँचले कारण सर्ट सर्किट भएको देखाएको छ”, तेलङ्गाना विपद् प्रतिक्रिया तथा अग्नि सेवाका महानिर्देशक वाई नागी रेड्डीले भन्नुभयो, “सबै १७ जनाको मृत्यु धुवाँ फोक्सोमा गएकाले भएको हो, कसैलाई जलनका चोटहरू थिएन ।”

गुलजार हाउस क्षेत्रमा कृष्णा पर्ल्स पसल र आवासीय परिसरमा आगलागीको घटना भएको थियो ।

भारतद्वारा ७७ करोड अमेरिकी डलरबराबरको बङ्गलादेशबाट हुने आयातमा प्रतिबन्ध

नयाँदिल्ली ।विदेश व्यापार महानिर्देशनालय (डीजीएफटी) द्वारा जारी एक निर्देशनपछि भारतको केन्द्रीय वाणिज्य तथा उद्योग मन्त्रालयले शनिबार बङ्गलादेशबाट आयात हुने विभिन्न श्रेणीका सामानमा तत्काल बन्दरगाह प्रतिबन्ध लगाएको छ । 

व्यापार केन्द्रित अनुसन्धान समूह ग्लोबल ट्रेड रिसर्च इनिसियटिभ (जीटीआरआई) को रिपोर्टअनुसार भारतले भूमि बन्दरगाह ९स्थलमार्ग० हुँदै बङ्गलादेशबाट हुने आयातमा लगाएको प्रतिबन्धले ७७ करोड अमेरिकी डलर बराबरको सामानमा असर पार्नेछ, जुन कुल द्विपक्षीय आयातको करिब ४२ प्रतिशत हो ।

केन्द्रीय वाणिज्य तथा उद्योग मन्त्रालयले शनिबार बङ्गलादेशबाट विभिन्न श्रेणीका सामानआयातमा तत्काल लागु हुनेगरी प्रतिबन्धको घोषणा गरेको हो ।

भ्रष्टाचारसम्बन्धी विषयको छानबिन गर्न भ्रष्टाचारमा विवादित सांसद मञ्जु खाँणको संयोजकतत्वमा समिति गठन

बुटवल । भ्रष्टाचारसम्बन्धी विषयको छानबिन गर्न भ्रष्टाचारमा विवादित सांसद मञ्जु खाँणको संयोजकतत्वमा समिति गठन भएको छ ।गौतमबुद्ध अन्तर्राष्ट्रिय विमानस्थलको निर्माणका क्रममा भएका त्रुटि, अनियमितता र भ्रष्टाचार छानबिन गर्न गठित प्रतिनिधिसभाअन्तर्गतको सार्वजनिक लेखा समितिको उपसमिति संयोजकमा कांग्रेस सांसद मञ्जु खाँण चयन भएकी हुन् ।

आइतबार बसेको बैठकले खाँणलाई संयोजक चयन गर्ने निर्णय लिएको समितिका सचिव तथा संसद् सचिवालयका प्रवक्ता एकराम गिरीले जानकारी सार्वजनिक गरेका छन् ।यसअघि उक्त उपसमितिको संयोजक सरकारको नेतृत्व गरिरहेको एमालेका सांसद तथा पूर्वसंस्कृति, पर्यटन तथा नागरिक उड्डयनमन्त्री योगेश भट्टराई थिए । भट्टराई नेतृत्वको उपसिमितिले रूपन्देहीको भैरहवामा रहेको गौतम बुद्ध अन्तर्राष्ट्रिय विमानस्थल निर्माणका क्रममा भ्रष्टाचार र अनियमिततामाथि छानबिन नै नगरी प्रारम्भिक प्रतिवेदन तयार पारेपछि प्रश्न उठेको थियो ।

प्रतिनिधिसभामा विद्युत् समस्या, सडक दुर्घटना र साम्प्रतिक घटनाप्रति सांसदहरूको ध्यानाकर्षण

काठमाडौँ । प्रतिनिधिसभाको आजको बैठकमा सांसदहरूले समयसमयमा विद्युत् आपूर्ति बन्द हुनुका कारणबारे सरकारको ध्यानाकर्षण गराउनुभएको छ । उहाँहरूले विद्युत् आपूर्तिमा देखिएको समस्या तत्काल समाधान गरी नियमित आपूर्तिका लागि सरकारसँग माग गर्नुभयो ।

बैठकमा राष्ट्रिय स्वतन्त्र पार्टी (रास्वपा) का सांसद शिव नेपालीले भन्नुभयो, “अहिले घरघरमा अध्याँरो भइरहेको हुन्छ, बत्ती झ्यापझ्याप गइरहेको छ, यसका कारणबारे जानकारी गराइ यथाशीघ्र समस्या समाधान गर्न आग्रह गर्दछु ।”

आइतबार सुनको भाउ घटेर प्रतितोला १ लाख ८४ हजार २०० रुपैयाँ कायम

काठमाडौँ । साताको पहिलो कारोबार दिन आइतबार सुनको भाउ घटेर प्रतितोला १ लाख ८४ हजार २०० रुपैयाँ कायम भएको छ ।   आइतबार सुनको भाउ तोलामा ६०० रुपैयाँले घटेको हो ।

नेपाल सुनचाँदी व्यवसायी महासंघका अनुसार आइतबार सुन प्रतितोला १ लाख ८४ हजार २०० रुपैयाँमा कारोबार भइरहेको छ । शुक्रबार सुन प्रतितोला १ लाख ८४ हजार ८०० रुपैयाँमा कारोबार भएको थियो ।

नेपाल राष्ट्र बैंकले २४ अर्ब रुपैयाँ निक्षेप संकलन गर्दै

काठमाडौँ । नेपाल राष्ट्र बैंकले बैंकिङ प्रणालीबाट २४ अर्ब रुपैयाँ निक्षेप संकलन गर्न लागेको छ । राष्ट्र बैंकले विभिन्न विशिष्टता तथा शर्तका आधारमा बैंक तथा वित्तीय संस्थाहरूबाट २१ दिनका लागि २४ अर्ब रुपैयाँ तान्न लागेको हो । 

राष्ट्र बैंकबाट इजाजत प्राप्त बैंक तथा वित्तीय संस्थाहरूले जेठ ४ गते आज तीन बजे दिउँसोसम्म अनलाइड बिडिङ सिस्टम सफ्टवेयरको उपयोग गरी निक्षेप संकलनमा सहभागी हुन ब्याजदर उल्लेख गरी प्रस्ताव गर्न पाउने भएका छन् ।

यो निक्षेप संकलनमा भाग लिनेहरूले तोकिएको शर्तको अधीनमा रही बोलकबोलको आवेदन दिनपर्ने जारी सूचनामा जनाइएको छ ।