काठमाडौँ ।मिथिला लघुवित्त वित्तीय संस्था लिमिटेड (MLBBL) ले आर्थिक वर्ष 2080/81 को चौथो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार लघुवित्तले उल्लेखनीय नाफा आर्जन गर्दै वित्तीय प्रदर्शनमा मजबुत सुधार देखाएको छ।

संस्थाले चौथो त्रैमाससम्ममा ८ करोड ४१ लाख रुपैयाँ खुद नाफा आर्जन गरेको छ, जुन अघिल्लो आर्थिक वर्षको सोही अवधिमा आर्जन गरेको ४ करोड ७५ लाख रुपैयाँको तुलनामा ७७ प्रतिशतले बढी हो। खुद ब्याज आम्दानी र सञ्चालन मुनाफामा आएको वृद्धि नै नाफामा देखिएको वृद्धिको मुख्य कारण मानिएको छ।

समीक्षा अवधिमा:

• खुद ब्याज आम्दानी ४१.८६% ले वृद्धि

• अन्य सञ्चालन आम्दानी ३४.९१% ले वृद्धि

• कुल सञ्चालन आम्दानी ४०.३६% ले वृद्धि

• सञ्चालन मुनाफा १०७.६८% ले वृद्धि

नाफाको वृद्धिसँगै लघुवित्तको प्रतिशेयर आम्दानी (EPS) पनि उल्लेखनीय रूपमा बढ्दै १३ रुपैयाँ ३२ पैसाले वृद्धि भई ३७ रुपैयाँ ५८ पैसामा पुगेको छ। यसैगरी, प्रतिशेयर नेटवर्थ १९१ रुपैयाँ २९ पैसा रहेको छ भने मूल्य/आम्दानी अनुपात (P/E ratio) ४२.५५ गुणामा रहेको छ।

हाल मिथिला लघुवित्तको चुक्ता पूँजी २२ करोड ३९ लाख रुपैयाँ छ भने जगेडा कोष मा २० करोड ४४ लाख रुपैयाँ सञ्चित छ। लघुवित्तले आर्थिक वर्षको अन्त्यसम्ममा १ अर्ब ७७ करोड रुपैयाँ सापटी, १ अर्ब १८ करोड रुपैयाँ निक्षेप संकलन, र २ अर्ब ९६ करोड रुपैयाँ कर्जा प्रवाह गरेको छ।

संस्थाको वित्तीय विवरणले लघुवित्त क्षेत्रमा यसको मजबुत उपस्थिति र स्थायित्वलाई पुष्टि गरेको छ।