Aug 24 2025 | २०८२, भदौ ८गते
काठमाडौँ । चालुखाता ४ खर्ब बढीले बचत रहेको छ । नेपाल राष्ट्र बैंकले आर्थिक वर्ष २०८१/८२ मा देशको चालु खाता रु.४ खर्ब ९ अर्ब २० करोडले बचतमा रहेको जनाएको हो । राष्ट्र बैंकले आइतबार आर्थिक वर्ष २०८१÷०८२ को वार्षिक प्रतिवेदन सार्वजनिकमा यस्तो जनाइएको छ ।
सो प्रतिवेदन अनुसार अघिल्लो वर्ष चालु खाता रु.२ खर्ब २१ अर्ब ७१ करोडले बचतमा रहेको थियो। यसआधारमा चालु खाता बचतमा सुधार देखिएको छ । यस्तै अमेरिकी डलरमा अघिल्लो वर्षमा १ अर्ब ६७ करोडले बचतमा रहेको चालु खाता समीक्षा वर्षमा ३ अर्ब १ करोड छ ।
यस्तै समीक्षा वर्षमा खुद पुँजीगत ट्रान्सफर रु.९ अर्ब ८४ करोड रहेको छ । अघिल्लो वर्षमा यस्तो ट्रान्सफर रु.५ अर्ब ८१ करोड रहेको थियो। यसैगरी, समीक्षा वर्षमा प्रत्यक्ष वैदेशिक लगानी (इक्विटी मात्र) रु.१२ अर्ब २ करोड भित्रिएको छ । अघिल्लो वर्ष यस्तो प्रत्यक्ष वैदेशिक लगानी (इक्विटी मात्र) रु.८ अर्ब ४७ करोड रहेको थियो ।
समीक्षा वर्षमा शोधनान्तर स्थिति रु.५९४ अर्ब ५४ करोड बचत छ । अघिल्लो वर्ष शोधनान्तर स्थिति रु.५०२ अर्ब ४९ करोडले बचतमा रहेको थियो। अमेरिकी डलरमा अघिल्लो वर्ष ३ अर्ब ७७ करोडले बचतमा रहेको शोधनान्तर स्थिति समीक्षा वर्षमा ४ अर्ब ३७ करोडले बचतमा रहेको बैंकले जनाएको छ ।
© 2025 All right reserved to Nayasadak.com | Site By : Sobij
