Aug 29 2025 | २०८२, भदौ १३गते
काठमाडौं । संघीय मामिला तथा सामान्य प्रशासन मन्त्रालयले एकैपटक १२२ जना उपसचिव र ९७ जना शाखा अधिकृतको सरुवा गरेको छ। तीमध्ये अधिकांशलाई गाउँपालिका र नगरपालिकामा प्रमुख प्रशासकीय अधिकृत (प्रमुख प्रशा. अ.) का रूपमा खटाइएपछि देशभरका पालिकामा अब ‘निमित्त प्रमुख प्रशासकीय अधिकृत’ शून्य भएको दाबी गरिएको छ।
मन्त्री भगवती न्यौपानेले स्थानीय तह पुनर्संरचना पश्चात् पहिलोपटक देशभरका नगरपालिका तथा गाउँपालिकामा दरबन्दी अनुसारका प्रमुख प्रशासकीय अधिकृत खटाइएकाले पूर्ण जिम्मेवारीसहितको प्रशासनिक नेतृत्व सुनिश्चित भएको बताइन्।
यसअघि १०५ नगरपालिका र ८६ गाउँपालिका निमित्त प्रमुख प्रशासकीय अधिकृतका भरमा सञ्चालन भइरहेका थिए। मन्त्री न्यौपानेले भनिन्, “मैले मन्त्रालय सम्हाल्दा ७५३ मध्ये करिब २०० पालिका निमित्तका भरमा चलिरहेका थिए। आजबाट देशभरका गाउँपालिका र नगरपालिकालाई निमित्त विहीन बनाइएको छ।”
मन्त्रालयका अनुसार निजामती सेवा ऐन, २०४९ अनुसार अवकाशको चरणमा रहेका कर्मचारीबाहेक, पारदर्शिता, कार्यकुशलता र भौगोलिक क्षेत्रको अनुभव दिलाउने गरी प्रमुख प्रशासकीय अधिकृत खटाइएको हो। त्यसक्रममा २ वर्षभन्दा बढी मन्त्रालयमै सीमित, उपत्यका केन्द्रित कार्यालयमा मात्र रहेका, स्थानीय तहमा अनुभव नलिएका, प्रदेशमा खटिएका तथा अतिरिक्त समूहमा रहेका कर्मचारीलाई प्राथमिकतामा राखिएको छ।
मन्त्री न्यौपानेले भनिन्, “स्थानीय तहलाई निमित्त प्रमुखका भरमा चलाउने प्रवृत्ति अन्त्य गर्नुपर्ने भएकाले यो निर्णय गर्नुपर्यो। खटाइएका कर्मचारीले उच्च दक्षता र इमानदारीसाथ जिम्मेवारी निर्वाह गर्नुपर्छ।”
दरबन्दी अनुसारका प्रमुख प्रशासकीय अधिकृत खटाइएकाले यसअघि निमित्त प्रमुख प्रशासकीय अधिकृतलाई दिइएको आर्थिक वा प्रशासनिक जिम्मेवारी स्वतः रद्ध भएको मन्त्रालयले जनाएको छ। साथै, सहसचिवस्तरका प्रमुख प्रशासकीय अधिकृत हुने नौ उपमहानगरपालिका र एउटा महानगरपालिकामा पनि छिट्टै दरबन्दी अनुसारका कर्मचारी खटाइने जानकारी दिइएको छ।
© 2025 All right reserved to Nayasadak.com | Site By : Sobij
