काठमाडौं । करिब चार वर्ष पछि मुस्ताङस्थित चीनसँग जोडिएको कोरला नाका सोमबार खुलेपछि त्यहाँका स्थानीयहरूमा खुसियाली देखिएको छ ।
२०७६ चैतदेखि ठप्प रहेको कोरला नाका सोमबारदेखि खुलेसँगै सरकारले वितरण गरेको सीमा पार पास देखाएर चीनतर्फ गएर खुसियाली जाहेर गरेका छन् ।
जिल्ला प्रशासन कार्यालय मुस्ताङले १ हजार हाराहारी सीमा पार पास वितरण गरेको र अझ केही वितरण गर्न बाँकी रहेको जनाएको छ ।
कोरला सीमा नाका बन्द हुन अघि त्यहाँ वर्षमा २ पटक मेला लाग्ने गरेको थियो ।
त्यो मेला स्थानीयहरूको आम्दानीको स्रोत बन्ने गरेको थियो । तर कोरोना महामारी फैलिएपछि नाका र मेला दुवै बन्द हुन पुगेको थियो ।
यो नाकाबाट खासगरी पीठो, खुर्सानी, बिजुलीका सामान, पेय पदार्थ लगायतको कारोबारसँगै चाडबाडको समयमा भेडा च्याङ्ग्रा पनि आयात निर्यात गरिने गरिएको छ ।
प्रधानमन्त्री प्रचण्ड चीन भ्रमणमा गएका बेला नाका खोल्ने सहमति भए अनुसार यो नाका खोलिएको हो ।
सोही सहमति अनुसार नाका जोडिएका पालिकाका नागरिकलाई पास वितरण गरियो ।
