काठमाडौं। अर्थमन्त्री विष्णु पौडेलले सुनचाँदी व्यवसायीहरूलाई सुनचाँदीमा भन्सार दर घटाउने विश्वास दिलाएका छन् । नेपाल सुनचाँदी व्यवसायी महासंघ, नेपाल रत्न तथा आभूषण महासंघ र नेपाल हस्तकला महासंघका पदाधिकारीहरूले अर्थमन्त्रालयमा भेट्न गएका बेला अर्थमन्त्री पौडेले सुनचाँदीको भन्सार दर घटाउन सरकार तयार रहेको विश्वास दिलाएका हुन् ।
नेपाल सुनचाँदी व्यवसायी महासंघका अध्यक्ष अर्जुन रसाइलीले अर्थमन्त्रीसँगको भेटवारे यस्तो जानकारी सार्वजनिक गरेका छन्। भारतमा भन्सार दर घटेको र त्यसले नेपालमा पारेको प्रभावलाई तत्काल सम्बोधन गर्न जरुरी रहेको सुनचाँदी व्यवसायीहरूले बताएपछि मन्त्री पौडेलले भन्सार दर घटाउन सरकार सकारात्मक रहेको बताए ।
नेपालले चालु वर्षको बजेटमार्फत सुन आयातमा भन्सार दर १५ बाट २० प्रतिशत पु¥याएपछि भारतले सुनको भन्सार दर ६ प्रतिशतमा झारेको छ। यसले गर्दा नेपालमा भन्दा अहिले भारतमा सुनको मूल्य प्रति तोला करिब १४ हजार रुपैयाँ सस्तो हुन पुगेको छ ।
व्यवसायीहरुले भन्सार दर सुनमा ८ र चाँदीमा ६ प्रतिशत कायम गर्न माग गरे । साथै उनीहरुले मूल्यका आधारमा भन्सार दर लिँदा दिन दिनै भाउ फरक परेर कारोबारमा समस्या हुने भएकाले १५÷१५ दिनका लागि फ्ल्याटमा भन्सार मूल्य तोक्न पनि आग्रह गरे । व्यवसायीहरुले दैनिक २० किलो सुन आयात सीमा बढाएर ५० किलो सुन आयात गर्ने व्यवस्था मिलाउन पनि माग गरे ।
