May 23 2025 | २०८२, जेठ ९गते
झापा । चालु आर्थिक वर्ष २०८१/८२ को पहिलो १० महिनामा नेपालले भारतबाट झन्डै साढे चार करोड रुपैयाँ बराबरको खरबुजा आयात गरेको छ। मेची भन्सार कार्यालयका सूचना अधिकारी ईश्वरकुमार हुमागाईँका अनुसार, सो अवधिमा भारतबाट १७ लाख ६५ हजार ९० किलो खरबुजा नेपाल भित्रिएको छ। गर्मी मौसममा उच्च माग हुने शीतल फलको रूपमा खरबुजा बजारमा लोकप्रिय हुँदै गएको छ।
नेपालमा पनि व्यावसायिक रूपमा खरबुजाखेती सुरु भएको केही वर्ष मात्र भएको भए पनि भारतबाट सस्तो मूल्यमा आयात हुने खरबुजाले घरेलु उत्पादनलाई प्रतिस्पर्धाबाट पछि पारिरहेको छ। खासगरी मूल्य प्रतिस्पर्धामा कमजोर ठहरिँदा स्थानीय किसानले उत्पादन बेच्न गाह्रो भइरहेको छ।
आयात तथ्यांकअनुसार, साउनदेखि वैशाखसम्मको अवधिमा सबैभन्दा धेरै खरबुजा चैत महिनामा आयात भएको हो। त्यस महिनामा मात्रै पाँच लाख १० हजार २३० किलो खरबुजा भित्रिएको छ, जसको मूल्य एक करोड ३३ लाख रुपैयाँभन्दा बढी रहेको छ। अन्य महिना पनि लगातार खरबुजा भित्र्याइएको पाइन्छ—जसमा साउनमा २ लाख ३० हजार किलो, भदौमा १ लाख ८६ हजार किलो, असोजमा १ लाख ४१ हजार किलो, कात्तिकदेखि पुससम्म क्रमशः घट्दो क्रममा आयात भएको देखिन्छ। फागुन र वैशाखमा समेत उल्लेखनीय परिमाणमा खरबुजा भित्रिएको छ।
स्थानीय उत्पादनको सन्दर्भमा, मेचीनगर–१५ स्थित ‘नेपाली बाबु स्मार्ट कृषि फार्म’ का सञ्चालक लीला खनालले आफ्नो फार्ममा व्यावसायिक रूपमा खरबुजाखेती गर्दै आएको बताए। साझेदारीमा १३ बिघा जमिनमा खेती गर्दै आएका खनालका अनुसार, गत वर्ष मात्रै करिब ३५० मेट्रिक टन खरबुजा उत्पादन गरिएको थियो। तर भारतीय उत्पादनको मूल्य कम भएकाले बजारमा प्रतिस्पर्धा गर्न कठिन भइरहेको उनी बताउँछन्।
नेपालको स्थानीय कृषकहरूले उत्पादनमा ध्यान दिए तापनि, सस्तो मूल्यमा आयात हुने विदेशी उत्पादनले उनीहरूको व्यापारमा असर पुर्याइरहेको देखिन्छ। यसले आयातमा निर्भरता घटाउन तथा स्थानीय उत्पादनलाई प्रोत्साहन गर्न नीति तहमा हस्तक्षेप आवश्यक रहेको संकेत गर्छ।
© 2025 All right reserved to Nayasadak.com | Site By : Sobij
