Aug 17 2025 | २०८२, भदौ १गते
काठमाडौँ । भौतिक पूर्वाधार तथा यातायात मन्त्री देवन्द्र दाहालले यस वर्षको दशैँ–तिहारमा सार्वजनिक यातायातको भाडा नबढाइने स्पष्ट पारेका छन् ।
प्रतिनिधि सभाको पूर्वाधार विकास समितिको आइतवारको बैठकमा बोल्दै उनले चाडपर्वको भीडभाडमा यात्रु थप मारमा नपरोस् भन्ने उद्देश्यले भाडा नबढाउने निर्णय भएको जानकारी दिए । इन्धनको मूल्यअनुसार भाडा घटबढ गर्ने प्रावधान भए पनि विशेष समयमा स्थायित्व दिने प्रयास गरिएको उनले बताए ।
मन्त्री दाहालले यातायात व्यवसायीहरुलाई चाडबाडको समयमा भाडा नबढाउन आग्रह गरेका छन् । साथै, व्यवसायीलाई परेका समस्या समाधान गर्न छलफलमार्फत पहल भइरहेको उनले उल्लेख गरे ।
सडक आयोजनाबारे कुरा गर्दै मन्त्री दाहालले अहिले संघीय मन्त्रालय मातहतका करिब ३२ हजार किलोमिटर सडक रहेको जानकारी दिँदै, प्रदेशस्तरमा रहेका सडक आयोजनाहरु प्रदेश सरकारलाई हस्तान्तरण गर्ने तयारी भइरहेको बताए । निर्माणाधीन सडक आयोजनासहित ज्यालादारी कामदार पनि प्रदेश सरकारकै मातहतमा पठाउने योजना रहेको उनले स्पष्ट पारे ।
© 2025 All right reserved to Nayasadak.com | Site By : Sobij
